मथुरा, काशी विश्वनाथ मंदिर उडवण्याची धमकी

लखनऊ:

लष्कर-ए-तोयबाने मथुरा आणि काशी विश्वनाथ मंदिरासहित देशातील अनेक धार्मिक स्थळे आणि उत्तर प्रदेशातील रेल्वे स्थानकांना बॉम्बने उडवून देण्याची धमकी दिली आहे. ६, ८ आणि १० जून रोजी हे स्फोट घडवून आणण्याची धमकी तोयबाने एका पत्राद्वारे दिल्याने खळबळ उडाली असून उत्तर प्रदेशात हाय अॅलर्ट जारी करण्यात आला आहे. तसेच तोयबाच्या या पत्राची सत्यताही पडताळण्यात येत आहे.

या पत्रावर लष्कर-ए-तोयबाचा जम्मू-काश्मीरमधील कमांडर मौलाना अंबू शेख याचे हस्ताक्षर आहे. लष्करच्या या धमकीच्या पत्रानंतर आयबीने तात्काळ अॅलर्ट जारी केला आहे. उत्तर प्रदेश पोलीसही सतर्क झाले असून धार्मिक, पर्यटन आणि सार्वजनिक ठिकाणच्या सुरक्षेत वाढ करण्यात आली असल्याचं अतिरिक्त पोलीस महानिरीक्षक आनंद कुमार यांनी सांगितलं. तसंच या पत्राची सत्यता तपासण्यात येत असल्याचंही त्यांनी स्पष्ट केलं.

बांके बिहारी मंदिर आणि श्रीकृष्ण जन्मभूमी रेल्वे स्टेशन परिसरात मोठा बंदोबस्त तैनात करण्यात आला आहे. या ठिकाणी कसून तपासणी करण्यात येत असून संशयितांवर करडी नजर ठेवण्यात येत आहे. वाराणासी प्रशासनानेही हाय अॅलर्ट जारी केला आहे. दरम्यान, काश्मीरच्या बांदीपुरा जिल्ह्यातील हाजिन येथे भारतीय सैन्याच्या तळावर आज अतिरेक्यांनी हल्ला केला. त्याची जबाबदारीही तोयबाने घेतली आहे.