कायदा मंत्रालयाचेही टीव्ही चॅनेल

वृत्तसंस्था, नवी दिल्ली

सर्वसामान्यांमध्ये कायदेविषयक जागरुकता वाढीस लागावी, तसेच न्यायालयाच्या महत्त्वपूर्ण आदेशांवर चर्चा व्हावी, या उद्देशाने ‘लॉ अँड लीगल स्टडीज चॅनेल’ हे स्वतंत्र टीव्ही चॅनेल सुरू करण्याची योजना कायदा मंत्रालयाने आखली आहे.

चर्चात्मक कार्यक्रम आणि डॉक्युमेंटरी यांचा पुरेसा साठा तयार झाल्यानंतर हे चॅनेल पूर्ण २४ तास चालवले जाईल. ‘स्वयम प्रभा’ या फ्री-टु-एअर डीटीएच बँक्वेमधील एक चॅनेल आपल्याला द्यावा, अशी मागणी कायदा मंत्रालयाने मनुष्यबळ विकास मंत्रालयाकडे केली आहे.

या चॅनेलसाठी कार्यक्रमांचा साठा करण्यासाठी कायदा मंत्रालयाने याआधीच काम सुरू केले आहे. कायदेविषयक साक्षरतेसाठी लघुपट पाठवण्याचे आवाहन करण्यात आले असून त्यासाठी व्हिडीओ स्पर्धा घेतली जाणार आहे. या विषयावर कार्यक्रमांची निर्मिती करण्यासाठी बॉलिवुडच्या दिग्दर्शकांचेही साह्य घेतले जाणार आहे.