लक्ष्मीकांत पार्सेकर यांचे बंडखोरीचे संकेत

वृत्तसंस्था, पणजी

गोव्यातील मांद्रे येथील पोटनिवडणुकीत भारतीय जनता पार्टीने उमेदवारी दिली नाही, तर भाजप नेते आणि माजी मुख्यमंत्री लक्ष्मीकांत पार्सेकर हे बंडखोरी करण्याच्या पवित्र्यात आहेत. दयानंद सोपटे आणि सुभाष शिरोडकर यांनी राजीनामा दिल्यामुळे मांद्रेम आणि शिरोडा या विधानसभा मतदारसंघांत पोटनिवडणूक होणार आहे. त्यांनी काँग्रेसचा राजीनामा देऊन गेल्या वर्षी ऑक्टोबर महिन्यात भाजपमध्ये प्रवेश केला होता.

'मांद्रे हा माझा पारंपरिक मतदारसंघ आहे. त्या ठिकाणहून मी नेहमी निवडणूक लढवित आलो आहे. मी निवडणूक लढवावी, ही कार्यकर्त्यांची इच्छा आहे. त्यामुळेच भाजपने मला निवडणूक लढविण्याची संधी दिली नाही, तर मी बंडखोरी करून निवडणुकीच्या रिंगणात उतरेन,' अशी घोषणा पार्सेकर यांनी केली. पक्षाचे प्रदेश सरचिटणीस सतीश धोंड यांनी मला सर्वेक्षण करून जिंकण्याची शक्यता किती आहे, हे तपासण्यास सांगितले आहे. त्यानुसार मी सर्वेक्षण करीत आहे, असे पार्सेकर यांनी स्पष्ट केले.