आमटे दापत्याला जीवनगौरव पुरस्कार; उद्या चांगुलपणाचे राष्ट्रीय शिखर संमेलन

नवी दिल्ली : येथील सीएसवाय सभागृहात १८ नोव्हेंबर रोजी होणाऱ्या चांगुलपणाच्या राष्ट्रीय शिखर संमेलनात माजी राष्ट्रपती रामनाथ कोविंद यांच्या हस्ते डॉ. प्रकाश आमटे आणि डॉ. मंदाकिनी आमटे यांना ‘चांगुलपणाचा जीवन गौरव पुरस्कारा’ने गौरविण्यात येणार आहे. याप्रसंगी वेगवेगळ्या क्षेत्रात काम करणाऱ्या अनेक व्यक्तींना चांगुलपणाचे पुरस्कार प्रदान करण्यात येतील.

संमेलनाचे उद्घाटन कोविंद व राष्ट्रीय मानवाधिकार आयोगाचे अध्यक्ष माजी न्यायमूर्ती अरुण मिश्रा यांच्या हस्ते तर, समारोप राज्यसभेचे उपसभापती हरिवंशजी यांच्या उपस्थितीत होणार आहे. दिवसभर चालणाऱ्या कार्यक्रमांमध्ये आयसीसीआरचे अध्यक्ष डॉ. विनय सहस्त्रबुद्धे, परराष्ट्र राज्यमंत्री मीनाक्षी लेखी, एअर मार्शल अजित भोसले, धनमंजुरी विद्यापीठ मणिपूरचे उपकुलगुरू नोंगामैथम सिंग, अमेरिकेच्या दलास ग्रुपचे सहसंस्थापक संजीव खन्ना यांची प्रमुख उपस्थिती आहे.

माजी परराष्ट्र सचिव ज्ञानेश्वर मुळे यांच्या संकल्पनेतून चांगुलपणाची चळवळ साकार झाली आहे. भारतीय संविधानातील स्वातंत्र्य, समता व न्याय या मूल्यांवर आधारित वेगवेगळ्या प्रकारचे जनजागृतीचे कार्यक्रम घेणे, समाजात प्रत्यक्षात तळागाळात जाऊन सामाजिक कार्य करणे हा चांगुलपणाच्या चळवळीचा उद्देश आहे. समाजात चांगुलपणा कसा रूजवता येईल यावर विविध सत्रांमध्ये मंथन होईल. स्वातंत्र्यानंतर ७५ वर्षांमधील भारताचा लेखाजोखा, सामाजिक न्याय व अंमलबजावणी तसेच पुढील २५ वर्षांचा देशाचा प्रवास यावर संमेलनात चर्चा होईल.