तब्बल ६ मैत्रिणींनी एकाच वेळी विष प्राशन केलं; नंतर समोर आलं धक्कादायक कारण!

पाटणा : तब्बल सहा मैत्रिणींनी विष प्राशन केल्याची घटना बिहारमधील औरंगाबाद इथं घडली आहे. यातील तीन जणींचा मृत्यू झाला आहे, तर अन्य तिघींवर रुग्णालयात उपचार सुरू आहेत. या घटनेनं बिहारमध्ये खळबळ उडाली असून प्रेम प्रकरणातून मुलींनी हे पाऊल उचलल्याचा संशय व्यक्त केला जात आहे. (Love Affair News)

मिळालेल्या माहितीनुसार, औरंगाबाद येथील एक तरुणी आपल्या भावाच्या मेहुण्यासोबत प्रेम करत होती. शुक्रवारी ही तरुणी इतर पाच मैत्रिणींसह तरुणाच्या घरी गेली आणि त्याला लग्नाची मागणी घातली. मात्र सदर तरुणाने तिला लग्नास नकार दिला. त्यामुळे निराश झालेल्या तरुणीने घरी आल्यानंतर विष प्राशन करत आत्महत्येचा प्रयत्न केला. त्यानंतर तिच्या पाच मैत्रिणींनीही विष प्राशन केलं. हा प्रकार लक्षात येताच कुटुंबातील सदस्यांनी सर्व सहा तरुणींना उपचारासाठी रुग्णालयात दाखल केलं. मात्र उपचारादरम्यान तीन जणींनी आपले प्राण गमावले आहेत, तर अन्य तिघींचा मृत्यूशी संघर्ष सुरू आहे.

आसाराम बापूच्या आश्रमात खळबळ; कारमध्ये सापडला मुलीचा मृतदेह, चार दिवसांपासून होती बेपत्ता

भावाच्या मेहुण्यावर प्रेम आणि नंतर टोकाचं पाऊल?

औरंगाबादचे पोलीस निरीक्षक कांतेश कुमार मिश्रा यांनी या घटनेबाबत प्राथमिक अंदाज व्यक्त केला आहे. त्यानुसार एका तरुणीचा आपल्या भावाच्या मेहुण्यावर जीव जडला होता. मात्र या मेहुण्याने तरुणीशी लग्न करण्यास नकार दिला आणि त्यानंतर ही घटना घडल्याचं सांगण्यात येत आहे.

दरम्यान, या घटनेनंतर गावात प्रचंड तणाव निर्माण झाला असून कोणताही अनुचित प्रकार घडू नये, यासाठी पोलिसांनी मोठा बंदोबस्त तैनात केला आहे. प्रेम प्रकरणातून ही घटना घडल्याची शक्यता वर्तवण्यात येत असली तरी अद्याप कोणतेही ठोस पुरावे पोलिसांच्या हाती लागलेले नाहीत. त्यामुळे सहा तरुणींनी विष प्राशन करण्याचा निर्णय का घेतला, याचं कारण शोधण्याचं आव्हान पोलिसांसमोर निर्माण झालं असून याप्रकरणी पोलिसांकडून पुढील तपास करण्यात येत आहे.