कुटुंबात दहशतवादी मान्य नाही!

मटा ऑनलाइन वृत्त । नवी दिल्ली

एक धर्म आणि एक ईश्वर यावर माझा विश्वास असून माझ्या कुटुंबात दहशतवादी असणं मला कधीही मान्य होणार नाही, अशा शब्दांत हादियाचे वडील के. एम. अशोकन यांनी आज आपली भूमिका स्पष्ट केली.

पत्रकारांनी आंतरधर्मीय विवाहाबद्दल विचारले असता हादियाच्या निर्णयाबद्दल त्यांनी तीव्र नाराजी व्यक्त केली. हादियाला इस्लामचा स्वीकार केल्यानंतर सीरियाला जायचे आहे. मात्र सीरियातील परिस्थितीबद्दल ती पूर्णपणे अनभिज्ञ आहे, असे अशोकन म्हणाले.

केरळमधील बहुचर्चित 'लव जिहाद' प्रकरणी सुप्रीम कोर्टाने सोमवारी हादियाची बाजू ऐकून घेतल्यानंतर तिला स्वातंत्र्य बहाल केलं. हादियाने तिला शिक्षण पूर्ण करायचे असल्याचे कोर्टात सांगितले होते त्यानुसार तिला पालकांच्या 'कस्टडी'तून मुक्त करून पुढील शिक्षणासाठी सेलम (तामिळनाडू) येथे जाण्याची परवानगी सुप्रीम कोर्टाने दिली.

याबाबत बोलताना हादियाच्या वडिलांनी संमिश्र भावना व्यक्त केल्या. गेले काही महिने जो घटनाक्रम घडला त्यामुळे माझ्या मुलीच्या शिक्षणात अडथळे आले होते. मात्र आता कोर्टाने तिला पुढील शिक्षण पूर्ण करण्याची अनुमती दिल्याने मी आनंदी असल्याचे अशोकन यांनी पत्रकारांना सांगितले.

हादियाला नजरकैदेत ठेवण्यात आल्याचा आरोप त्यांनी फेटाळून लावला. घरात आणि घराबाहेरही ती पोलीस संरक्षणात वावरत होती, असे अशोकन म्हणाले. माझी मुलगी सेलम येथे कोर्टाच्या देखरेखीखाली आणि संपूर्ण संरक्षणात राहणार असल्याने आपणास कोणतीही चिंता नसल्याचेही त्यांनी नमूद केले. जेव्हा गरज असेल तेव्हा मी सालेम येथे जाऊन मुलीची भेट घेणार आहे, असेही त्यांनी पुढे सांगितले. शफीन जहान असेल वा अन्य कुणी कोर्टाने कुणासही माझ्या मुलीचं पालकत्व दिलेलं नाही. केवळ मी व अन्य जवळचे नातेवाईकच तिला भेटू शकणार आहेत, असेही अशोकन पुढे म्हणाले.

दरम्यान, केरळ पोलिसांच्या संरक्षणात हादिया आज सेलम येथे जाण्यासाठी रवाना झाली असून आजच ती सेलमला दाखल होणार आहे.