'सैफुल्लाच्या वडिलांचा देशाला अभिमान'

मटा ऑनलाइन वृत्त । नवी दिल्ली

दहशतवादी कारवाया करताना मारल्या गेलेल्या सैफुल्लाचा मृतदेह स्वीकारण्यास नकार देणारे त्याचे वडील मोहम्मद सरताज यांच्याबद्दल केंद्रीय गृहमंत्री राजनाथ सिंह यांनी आज गौरवोद्गार काढले. 'सरताज यांचा देशाला अभिमान आहे,' असं राजनाथ यांनी सांगितलं.

भोपाळ-उज्जैन पॅसेंजर गाडीतील बॉम्बस्फोटानंतर दहशतवादविरोधी पथकानं सहा संशयित दहशतवाद्यांना अटक केली आहे. तर, या बॉम्बस्फोटाचा एक संशयित सैफुल्ला हा पोलिसांशी झालेल्या चकमकीत मारला गेला. दहशतवादी कारवाया करताना आपला मुलगा मारला गेल्याचं कळल्यानंतर सैफुल्लाच्या कुटुंबानं त्याचा मृतदेह स्वीकारण्यास नकार दिला होता. 'सैफुल्लानं देशविरोधी काम केलं आहे. जो देशाचा झाला नाही, तो आमचा काय होणार,' अशा संतप्त भावना सैफुल्लाच्या वडिलांनी व्यक्त केल्या होत्या.

बॉम्बस्फोटाची ही घटना व त्यानंतरच्या पोलीस कारवाईबाबत राजनाथ सिंह यांनी आज संसदेत सविस्तर निवेदन दिलं. त्यावेळी त्यांनी सैफुल्लाच्या वडिलांचा आवर्जून उल्लेख केला. संपूर्ण सभागृहानं मोहम्मद सरताज यांच्याप्रती सहवेदना व्यक्त करायला हव्यात, असं ते म्हणाले.