‘तेजस’ उद्या हवाई दलात दाखल

वृत्तसंस्था, बेंगळुरू

स्वदेशी बनावटीचे ‘तेजस’ हे हलके लढाऊ विमान शुक्रवारी हवाई दलामध्ये दाखल होणार आहे. ‘हिंदुस्तान एअरोनॉटिक्स लिमिटेड’ दोन विमाने हवाई दलाला सुपूर्द करील. ‘तेजस’च्या पहिल्या स्क्वाड्रनचे नाव ‘फ्लाइंग डॅगर्स’ ४५ हे असेल.

बेंगळुरूच्या ‘एअरक्राफ्ट सिस्टीम टेस्टिंग एस्टाब्लिशमेंट’ या ठिकाणी हा कार्यक्रम होणार आहे. पहिली दोन वर्षे तेजस विमानांची स्क्वाड्रन बेंगळुरू येथे राहील. त्यानंतर तामिळनाडू येथे सुलूर येथे ती हलविण्यात येईल. हवाई दलप्रमुख एअर चीफ मार्शल अरूप राहा यांनी १७ मे रोजी या विमानांतून पहिल्यांदा उड्डाण केले होते. हे विमान हवाई दलामध्ये दाखल करून घेण्यास अतिशय चांगले आहे, अशी प्रतिक्रिया त्यांनी दिली होती. या आर्थिक वर्षात आणखी सहा विमाने हवाई दलामध्ये दाखल होण्याची शक्यता आहे.

> किलोमीटर/तास वेग: १३५० > वजन: १२ टन > लांबी: १३.२ मीटर > एकूण विकास आणि उत्पादन किंमत: ५५ हजार कोटी > स्वदेशी बनावटीचे प्रमाण: ६५ टक्के > विंग स्पॅन: ८.२ मीटर