३०० किलो कांदा विकून हाती आले फक्त २ रुपये, शेतकऱ्याच्या नशिबी अश्रूच

भोपाळ: मध्य प्रदेशात कांदा आणि लसूणचं पिक घेणाऱ्या शेतकऱ्यांची अवस्था बिकट आहे. याचा अंदाज तुम्ही यावरून लावू शकता की, ३०० किलो कांदा विकून शेतकऱ्याच्या हातात फक्त २ रुपये आले आहेत. हे प्रकरण उज्जैन विभागातील शाजापूर कृषी मंडईचे आहे. सध्या मध्य प्रदेशात कांदा आणि लसूणचे भाव खूपच कमी झाले आहेत. कांद्याला भाव कमी असल्याने शेतकऱ्यांना आर्थिक फटका बसत आहे.

अलीकडेच शाजापूर मंडईत असाच एक प्रकार समोर आला, जो ऐकून आणि पाहून लोक आश्चर्यचकित झाले. भदोनी गावात राहणाऱ्या जयराम या शेतकऱ्याने एका फर्मला ३०० किलो कांदा विकला होता.

हेही वाचा -शेतकरी रोपटं लावत होता, कुदळ मारताच हाती आला ५ व्या शतकातील खजिना

दुकानाचे संचालक अशोक गामी आणि सदाकत यांनी सांगितले की, जयराम कांद्याची ६ पोती घेऊन बाजारात पोहोचला होता. सकाळी तो मार्केटमध्ये पोहोचला तेव्हा त्याने ३०० रुपये आगाऊ घेतले होते. त्यानंतर कांद्याची खरेदी सुरू झाली. त्यांचा कांदा ८० पैसे ते १.२५ रुपये प्रतिकिलो या दरम्यान विकला गेला. अशा प्रकारे कांद्याचे ३३० रुपये त्यांना मिळाले.

या दरम्यान कांदा बाजारात आणण्याचा खर्च आणि वजन आणि हमालीचा खर्च ३२८ रुपये आला. यानंतर जयराम या शेतकऱ्याची अवघी २ रुपयांची बचत झाली. ३०० किलो कांदा विकून शेतकऱ्याला २ रुपये मिळाल्याने शेतकरीही अवाक् झाला. शेतमालाला योग्य भाव मिळत नसल्याने खुद्द व्यापारी देखील चिंतेत आहेत.

हेही वाचा -Signal From Space: अंतराळातून ८२ तासांत जवळपास २००० रहस्यमयी सिग्नल, शास्त्रज्ञांची झोप उडाली...

चांगला कांदा ११ रुपये किलोपर्यंत विकला गेला

मार्केटमध्ये चांगला कांदा ८ ते ११ रुपये किलोने विकला जात आहे. तर मध्यम प्रतीचा कांदा ५ ते ८ रुपये किलोने विकला जात आहे. तर जो कांदा कमी प्रतीचा असेल तो १ रुपये किलोपेक्षा कमी दराने विकला जात आहे. जयरामच्या कांद्याचा दर्जाही अत्यंत खराब होता. कांदा लहान असल्याने ८० पैसे ते सव्वा रुपये किलोने तो विकला गेला.

हेही वाचा -समुद्राच्या पोटात सापडला १३०० वर्ष जुना खजिना, सोनं-चांदी, हिरे, मोती नव्हे; २०० माठांतून निघाल्या वेगळ्याच वस्तू