चहाविक्रेत्याच्या मुलीची भरारी; एअर फोर्समध्ये निवड

निमुच (मध्य प्रदेश):

मध्य प्रदेशातील निमुच येथील एका चहाविक्रेत्याच्या मुलीनं गगनभरारी घेतली आहे. आंचल गंगवाल असं या २४ वर्षीय मुलीचं नाव असून, तिची हवाई दलात निवड झाली आहे. ३० जूनपासून ती हैदराबादमधील हवाई दलाच्या अकादमीत रुजू होणार आहे.

२०१३ मध्ये उत्तराखंड येथील महापुरावेळी भारतीय हवाई दलाने केलेले बचावकार्य पाहून आंचल प्रभावित झाली होती. 'मी इयत्ता बारावीत असताना उत्तराखंड येथे महापूर आला होता. हवाई दलातील जवानांचे कार्य पाहून मी प्रभावित झाले. त्यामुळेच मी हवाई दलात जाण्याचा निर्णय घेतला,' असं आंचलनं सांगितलं.

भारतीय हवाई दलात निवड होणं सोपं नव्हतं. पाच वेळा प्रयत्न करूनही यश मिळत नव्हते. परंतु, सहाव्या प्रयत्नात यश पदरी पडलं, असं आंचल म्हणाली. ७ जून रोजी परीक्षेचा निकाल लागला. देशभरातील २२ उमेदवारांमधून तिची निवड झाली आहे. ६ लाख विद्यार्थ्यांनी ही परीक्षा दिली होती. आंचलचे वडील सुरेश गंगवाल यांचा निमुच येथे चहाचा स्टॉल आहे. मुलीला मिळालेल्या यशामुळे आता त्यांच्या 'नामदेव चहा स्टॉल'लाही प्रसिद्धी मिळत आहे. येथे चहा पिण्यासाठी येणारे लोक सुरेश यांचे अभिनंदन करत आहेत. आंचलच्या प्रशिक्षणासाठी सुरेश यांनी कर्ज घेतले होते. आंचलला आणखी दोन भावंडंही आहेत. तिचा मोठा भाऊ अभियांत्रिकीचे शिक्षण घेत आहे. लहान बहीण बारावीत शिकत आहे.