महात्मा गांधींचे नातू कानू गांधी यांचे निधन

मटा ऑनलाइन वृत्त। सूरत

राष्‍ट्रपिता महात्‍मा गांधी यांचे नातू, नासाचे माजी शास्त्रज्ञ कानू गांधी यांचं आज संध्याकाळी सूरतमध्ये प्रदीर्घ आजाराने निधन झालं. ते ८७ वर्षांचे होते. गेल्या अनेक दिवसांपासून ते सुरतमध्ये खासगी रूग्णालयात उपचार घेत होते.

१९३० मधील प्रसिद्ध दांडीच्या मिठाच्या सत्याग्रहात महात्मा गांधी यांच्या काठीला पकडून महात्मा गांधींच्या पुढे चालणारा चिमुकला मुलगा प्रसिद्ध झाला होता. हा मुलगा म्हणजेच महात्मा गांधींचे नातू कानू गांधी हे होत.

२२ ऑक्टोबरला कानू गांधींना ह्रदयविकाराच्या धक्क्यासह मेंदूत रक्तस्त्राव झाला होता. यामुळे त्यांना अर्धांगवायूही झाला होता. यानंतर ते बेशुद्धावस्थेत गेले होते. प्रयत्न करूनही कानू गांधी पुन्हा शुद्धीवर येऊ शकले नाहीत.

कानू गांधींनी अमेरिकेतील प्रतिष्ठित संस्था असलेल्या एमआयटीमधून शिक्षण घेतलं होतं. ते आणि त्यांची पत्नी दिल्लीच्या वृद्धाश्रमात राहत असल्याचं समोर आल्यानंतर कानू गांधी चर्चेत आले होते. त्यावेळी त्यांनी कोणालाही दोषी ठरवलं नव्हतं. आपण कोणाकडून मदत मागणार नसल्याचंही त्यांनी त्यावेळी स्पष्ट केलं होतं.