पोलिसाने कुटुंब वाढवण्यासाठी मागितली सुट्टी!

महोबा (उत्तर प्रदेश) :

एका पोलीस शिपायाने चक्क कुटुंब वाढवण्यासाठी सुट्टी मागितल्याचा प्रकार उत्तर प्रदेशात घडला आहे. सुट्टीच्या या अजब अर्जाने पोलिसांच्या सुट्ट्यांचा प्रश्न उत्तर प्रदेशात किती गंभीर बनला आहे, हेही समोर आले आहे.

सोशल मीडियावर हा सुट्टीचा अर्ज व्हायरल झाला आहे. महोबा जिल्ह्यातील हा प्रकार असून सोम सिंह नावाच्या पोलीस शिपायाने हा अर्ज केला आहे. मला माझे कुटुंब वाढवायचे असून त्यासाठी ३० दिवसांची सुट्टी मिळावी, अशी विनंती रजेच्या अर्जात करण्यात आली आहे. २३ जूनपासून पुढे एक महिना सुट्टीची मागणी सोम सिंहने केली असून संबंधित अधिकाऱ्याने सोम सिंहची निकड लक्षात घेऊन स्वत:हून ४५ दिवसांच्या सुट्टीची शिफारस केली आहे.

सोम सिंहशी याबाबत संपर्क केला असता त्याने व्हायरल झालेला अर्ज बोगस असल्याचे म्हटले आहे. मला घर बांधायचे असून त्यासाठी मी २५ जूनपासून एक महिन्याच्या सुट्टीवर जात असल्याचे त्याने नमूद केले.

दरम्यान, महोबा पोलीस ठाण्यातील सूत्रांच्या म्हणण्यानुसार, सोम सिंहने आधी केलेल्या अर्जात कुटुंब वाढवण्यासाठी सुट्टी मिळावी, असा उल्लेख केला होता. हा अर्ज व्हायरल झाल्यानंतर वरिष्ठ अधिकाऱ्यांच्या दबावामुळे सोम सिंहला नवा अर्ज द्यावा लागला. आधी सोम सिंहची सुट्टी २३ जूनपासून मंजूर होती ती आता २५ जूनपासून करण्यात आली आहे, असेही सूत्रांनी सांगितले.