जगभरातील नेत्यांचे मोदींनी मानले आभार, ट्रम्प यांनीही केले अभिनंदन
वृत्तसंस्था, नवी दिल्ली
पंतप्रधान नरेंद्र मोदी यांचे विजयाबद्दल अभिनंदन करणाऱ्या जगभरातील नेते, खेळाडू आणि सेलिब्रिटींचे पंतप्रधान नरेंद्र मोदी यांनी आभार मानले आहेत. अमेरिकेचे उपाध्यक्ष माइक पॉम्पेओ यांच्या अभिनंदनपर ट्विटवर प्रतिक्रिया देताना मोदी यांनी, हा लोकशाहीचा विजय असल्याचे म्हटले आहे. शांतता आणि एकत्रित समृद्धीसाठी आम्ही अमेरिकेसोबतची भागीदारी कायम ठेवू, असेही मोदी यांनी म्हटले आहे.
रशियाचे अध्यक्ष व्लादिमीर पुतीन यांनी मोदी यांना ट्विटरवरून शुभेच्छा दिल्या आहेत. मोदी यांनी ट्विटरवरून पुतीन यांचे आभार मानले असून, लवकरच आपण भेटू, असे मोदी यांनी पुतीन यांना म्हटले आहे. अमेरिकेचे अध्यक्ष डोनाल्ड ट्रम्प यांच्यासह अमेरिकेतील नेत्यांनी पंतप्रधान नरेंद्र मोदी यांचे विजयाबद्दल अभिनंदन केले आहे. पंतप्रधान मोदी यांच्या दुसऱ्या कार्यकाळात भारत-अमेरिका संबंधांसाठी चांगल्या गोष्टी घडतील, असे ट्रम्प यांनी म्हटले आहे. 'नरेंद्र मोदी आणि त्यांच्या भारतीय जनता पक्षाचे निवडणुकीतील विजयाबद्दल अभिनंदन,' असे डोनाल्ड ट्रम्प यांनी ट्विटमध्ये म्हटले आहे. पंतप्रधन मोदी यांच्या पुनरागमनानंतर भारत-अमेरिका सहकार्यातून मोठ्या गोष्टी घडणार आहेत. आमचे महत्त्वाचे काम मोदी यांच्यासोबत एकत्रितपणे पुढे नेण्यासाठी मी उत्सुक आहे,' असे ट्विट ट्रम्प यांनी केले आहे.
कॅनडाचे पंतप्रधान जस्टिन ट्रुडो, फ्रान्सचे अध्यक्ष इमॅन्युअल मॅक्रॉन, इंडोनेशियाचे अध्यक्ष जोको विदोदो, नायजेरियाचे अध्यक्ष महंमद पुहारी, सौदी अरेबियाचे राजे सलमान, झिम्बाव्बेचे अध्यक्ष इमर्सन डाम्बुदझो मानग्वा आणि इतर जागतिक नेत्यांनी पंतप्रधान मोदी यांचे विजयाबद्दल अभिनंदन केले आहे. या देशांसोबत भारताचे सहकार्य पुढे नेण्यात येईल, असे मोदी यांनी या नेत्यांना दिलेल्या संदेशात म्हटले आहे.
अभिनेत्री शिल्पा शेट्टी कुंद्रा, रवीना टंडन, अभिनेता आर. माधवन, संगीतकार ए. आर. रेहमान, सरोदवादक अमजद अली खान, मुष्टियोद्धा मेरी कोम, नीरज चोप्रा यांनीही मोदी यांचे अभिनंदन केले आहे.
जगासाठी प्रेरणा
पंतप्रधान नरेंद्र मोदी यांचे अमेरिकेने अभिनंदन केले असून, भारतात नुकत्याच झालेल्या निवडणुका या मानवी इतिहासातील लोकशाहीतील सर्वांत मोठा उपक्रम असल्याचे म्हटले आहे. भारतातील निवडणुका संपूर्ण जगातील लोकांसाठी प्रेरणा असल्याचेही अमेरिकेने म्हटले आहे.
अमेरिकेचे उपाध्यक्ष मार्क पेन्स यांनी ट्विटरवरून पंतप्रधान मोदी यांना शुभेच्छा दिल्या. 'अमेरिकेचे सहकारी आणि मित्र पंतप्रधान नरेंद्र मोदी यांना भारतीय संसदीय निवडणुकीतील विजयाबद्दल शुभेच्छा,' असे ट्विट पेन्स यांनी केले आहे. भारतीय लोक लोकशाहीबद्दल कटिबद्ध असल्याचे दर्शन या निवडणुकीतून झाले, असेही त्यांनी म्हटले आहे.
अमेरिकेचे परराष्ट्रमंत्री माइक पॉम्पेओ यांनीदेखील ट्विटरवरून मोदी यांचे अभिनंदन केले. 'पंतप्रधान नरेंद्र मोदी आणि एनडीएचे भारतीय निवडणुकीत विजयाबद्दल, तसेच जगातील सर्वांत मोठ्या लोकशाहीमध्ये मतदान करणाऱ्या भारतीयांचे अभिनंदन. भारतातील निवडणूक जगासाठी प्रेरणा आहे,' असे पोम्पेओ यांनी म्हटले आहे.
'भारतातील निवडणुकीत सुमारे साठ कोटी लोकांनी मतदान केले. इतक्या मोठ्या प्रमाणावर मतदान झाल्याबद्दल लोकांना, तसेच ही निवडणूक प्रक्रिया राबवणाऱ्या भारत सरकारला आम्ही दाद देतो,' असे अमेरिकी परराष्ट्र मंत्रालयाचे प्रवक्ते मॉर्गन ऑर्टेगस म्हणाले.
भारतीय अमेरिकी काँग्रेसमन राजा कृष्णमूर्ती, रो खन्ना यांनीही मोदी यांचे अभिनंदन केले आहे. याशिवाय इतरही अमेरिकी खासदारांनी मोदी यांचे अभिनंदन केले आहे. टेक्सासचे गव्हर्नर ग्रेग अॅबॉट, ह्युस्टनचे महापौर सेलवेस्टर टर्नर, सिनेटर केविन थॉमस यांनीदेखील मोदी यांचे अभिनंदन केले आहे.
......