मेजर गोगोई हे माझे फेसबुक फ्रेंड; तरुणीचा खुलासा

श्रीनगर

अल्पवयीन तरुणीसोबत हॉटेलात गेल्यानं वादाच्या भोवऱ्यात सापडलेल्या मेजर लितूल गोगोई यांना मोठा दिलासा मिळाला आहे. ‘मेजर गोगोई हे माझे फेसबुक फ्रेंड असून स्वत:च्या मर्जीनेच मी त्यांच्यासोबत हॉटेलमध्ये गेले होते', असा जबाब त्या तरुणीनं जिल्हा न्यायदंडाधिकाऱ्यासमोर दिला आहे.

मेजर नितीन लितूल गोगोई हे एका तरुणीसोबत हॉटेलमध्ये गेल्यानं वादाच्या भोवऱ्यात सापडले आहेत. तरुणी अल्पवयीन असल्याने हॉटेल कर्मचाऱ्यांनी या दोघांना हॉटेलात प्रवेश नाकारला होता. मेजर गोगोई यांनी हॉटेल कर्मचाऱ्यांशी वाद घातल्याने हे प्रकरण पोलीस ठाण्यात पोहोचले. चौकशीनंतर गोगोई यांना सोडून दिले. परंतु, लष्करप्रमुख बिपीन रावत यांनी या प्रकरणाची गंभीर दखल घेत गोगोई दोषी आढळल्यास कडक कारवाई करू, असं म्हटलं आहे.

गोगोईसोबत हॉटेलात गेलेल्या तरुणीनं जिल्हा न्यायदंडाधिकाऱ्यांसमोर जबाब नोंदवला आहे. गोगोई आणि माझी फेसबुकवर मैत्री झाली असून ते माझे फेसबुक फ्रेंड आहेत. गोगोई यांनी अदिल अदनान नावानं एक बनावट फेसबुक अकाउंट केले होते. परंतु, काही दिवसानंतर अदिल अदनान हे अकाउंट गोगोई यांचंच असल्याचं माझ्या लक्षात आलं. काही महिन्यांनी गोगोई यांनीही मला त्यांचं खरं नाव सांगितलं, असं या तरुणीनं यावेळी सांगितलं. ‘माझे शिक्षण १० वीपर्यंत झाले असून मी एका बचत गटात काम करते. मी स्वेच्छेनेच गोगोईंसोबत हॉटेलमध्ये गेले. आम्हाला काही वेळ एकत्र घालवायचा होता. माझ्या आईचा याला विरोध होता तसेच आम्ही यापूर्वीही अनेकदा बाहेर भेटलो आहोत, असंही तिनं आपल्या जबाबात म्हटलं आहे. दरम्यान, पीडित तरुणीच्या आईनं गोगोई यांच्यावर गंभीर आरोप केले आहेत.