मल्याळी ग्रुपचा पाकच्या वेबसाइटवर स्ट्राइक

मटा ऑनलाइन वृत्त । त्रिवेंद्रम

पाकिस्तान आणि भारतीय हॅकर्समध्ये जोरदार सायबर युद्ध सुरू झाले आहे. पाकिस्तानच्या हॅकर्सनी भारतातील वेबसाइट हॅक केल्यानंतर त्याला भारतातील मल्याळी ग्रुपने जशास तसे उत्तर दिले आहे. या ग्रुपने पाकच्या विमानतळाची वेबसाइट हॅक करून पाकवर सायबर स्ट्राइकच केला आहे.

या मल्याळी सायबर एक्सपर्टने पाकिस्तानच्या सियालकोट विमानतळाचे अॅडमिन लॉगइन हॅक केलं. त्यानंतर या लॉगइनचा पासवर्ड बदलून 'मल्याळीज' असा केला आहे. हा पासवर्ड बदलल्यानंतर या ग्रुपनं त्याचा स्क्रीन शॉट घेऊन त्याला फेसबुकवर शेअर केलं आहे. तसेच फेसबुकवरील लोकांना त्यांनी या पासवर्डचा उपयोग करून या साइटला भेट देण्याचं आवाहनही केलं आहे.

'ट्रॉलर्सनं पासवर्ड बदलू नये, त्यामुळे फेलो ट्रॉलर्सला त्यांची कार्यकुशलता दाखविण्याची संधी मिळते', अशी विनोदी कमेंटही मल्याळी ग्रुपनं फेसबुकवरील या पोस्टबरोबर टाकली आहे. बुधवारी काश्मीरच्या चिता नावाच्या पाकिस्तानी सायबर अटॅकर ग्रुपनं त्रिवेंद्रम विमानतळाची वेबसाइट हॅक केली होती. त्याला उत्तर म्हणून मल्याळी ग्रुपनं पाकच्या विमानतळाची वेबसाइट हॅक केली असल्याचं सांगण्यात येतं.