'आधार'साठी तरुणाने 'या' मंत्र्याचा ताफा अडवला

नवी दिल्ली: आधार कार्ड केंद्रात अनेकवेळा चक्कर मारूनही आधार कार्डमधील नावात बदल करत मिळत नसल्याने वैतागलेल्या एका तरुणाने चक्क केंद्रीय संरक्षण मंत्री राजनाथ सिंह यांचा ताफाच अडवला. मंत्र्याच्या ताफ्यासमोर हा तरुण अचानक आल्याने सुरक्षा रक्षकांचीही काही वेळ तारांबळ उडाली. मला आधार कार्डमधील नावात बदल करायचा असून माझी पंतप्रधान नरेंद्र मोदींशी भेट घडवा, अशी विनंती त्याने यावेळी केली. परंतु, सुरक्षा रक्षकांनी त्याला ताब्यात घेतले असून त्याची चौकशी सुरू आहे.

विश्बर दासगुप्ता असा या ३५ वर्षीय तरुणाचं नाव आहे. तो उत्तर प्रदेशच्या कुशीनगर येथील रहिवासी आहे. त्याची मानसिक स्थिती चांगली नसल्याचं सांगण्यात येतं. आज दुपारी सव्वा एक वाजता संसद भवनासमोर ही घटना घडली. सव्वा एकच्या सुमारास राजनाथ सिंह यांचा ताफा येताच हा तरुण त्यांच्या गाडीसमोर थेट अडवा झाला. त्यामुळे सुरक्षा रक्षकांचा एकच गोंधळ उडाला आणि त्याला ताब्यात घेण्यात आलं. मला पंतप्रधान नरेंद्र मोदींना भेटायचं आहे. मला आधारकार्डातील नाव बदलून हवं आहे, अशी बडबड तो करत होता. दरम्यान, या तरुणाला पार्लमेंट स्ट्रीट पोलीस ठाण्यात नेण्यात आले. या घटनेचा व्हिडिओही सोशल मीडियावर मोठ्याप्रमाणावर व्हायरल झाला आहे. गेल्या आठवड्यात काही लोक परवानगी शिवाय काँग्रेस नेत्या प्रियांका गांधी यांच्या लोधी इस्टेटमधील घरात घुसले होते. सेल्फी काढण्यासाठी प्रियांका यांच्या घरात घुसल्याचं या लोकांचं म्हणणं होतं.

सुरक्षा भेदून प्रियांका गांधी यांच्या घरात घुसखोरी!