अरे आहेस कुठे? रेल्वे स्टेशनवरून मित्रानं कॉल केला, घरात वृद्धाचा जीव गेला; 'ती' चूक भोवली?

भोपाळ: मध्य प्रदेशच्या उज्जैनपासून ४० किलोमीटर अंतरावर असलेल्या बडनगरमध्ये सोमवारी एक हृदयद्रावक घटना घडली. ६८ वर्षांच्या दयाराम बारोड यांच्या घरात मोबाईलचा स्फोट झाला. चार्जिंगला लावलेल्या फोनवरून बारोड बोलत होते. तितक्यात मोबाईलचा स्फोट झाला. यामध्ये वृद्धाच्या डोक्यापासून छातीपर्यंतच्या भागाला गंभीर इजा झाली.

वृद्धाच्या घरात इतर कोणत्याही प्रकारचं स्फोटक आढळून आलेलं नाही. वृद्धाचा मृतदेह आढळलेल्या खोलीत ओप्पो कंपनीचा स्मार्टफोन सापडला. मोबाईलचे अक्षरश: तुकडे झाले. पोलिसांनी हे तुकडे गोळा करून तपासासाठी पाठवले आहेत. चार्जिंग लावलेल्या मोबाईलवरून बोलत असल्यानं त्याचा स्फोट झाला असावा, अशी शक्यता पोलिसांनी बोलून दाखवली.
घरात वृद्ध अडखळून पडला, हॉस्पिटलात CT स्कॅन; रिपोर्ट पाहून रुग्ण उडालाच, कुटुंबही शॉक
दयाराम यांना त्यांचे मित्र दिनेश चावडा यांनी कॉल केला होता. दयाराम आणि दिनेश चावडा इंदूरला एका कार्यक्रमासाठी जाणार होते. दिनेश यांनी रेल्वे स्थानकात पोहोचून इंदूरसाठीची तिकिटदेखील काढली. मात्र बराच वेळ उलटून गेल्यावरही दयाराम पोहोचले नाहीत. त्यामुळे दिनेश यांनी त्यांना कॉल केला. दयाराम यांनी कॉल घेतला आणि काही सेकंदांमध्ये त्यांचा फोन बंद झाला. त्यानंतर दिनेश यांनी अनेकदा कॉल करण्याचा प्रयत्न केला. मात्र मोबाईल स्विच्ड ऑफ होता. त्यानंतर दिनेश तातडीनं निघाले आणि दयाराम यांच्या घरी पोहोचले. घरातील परिस्थितीत पाहून दिनेश भेदरले. त्यांनी घटनेची माहिती पोलिसांनी दिली.

दयाराम यांच्या मानेपासून छातीपर्यंतच्या भागावर गंभीर जखमा होत्या. हा भाग पूर्णपणे छिन्नविछिन्न झाला होता. एका हातालादेखील गंभीर इजा झाली होती. घरात स्फोट झाला असून घटनास्थळी ओप्पो कंपनीचा मोबाईल तुकडे तुकडे झालेल्या अवस्थेत सापडला असल्याची माहिती पोलिसांनी दिली. चार्जर लावलेलं सॉकेटदेखील पूर्णत: जळून गेलं. घरात अन्य कोणत्याही प्रकारचा ज्वलनशील पदार्थ सापडलेला नाही.
मला शोधू नका म्हणत इस्रायलमध्ये बेपत्ता झालेला शेतकरी अखेर सापडला; आता म्हणतो, मी तर तिथे..
मोबाईलच्या स्फोटामुळेच वृद्धाचा मृत्यू झाला असावा अशी शंका पोलीस ठाण्याचे प्रभारी मनीष मिश्रा यांनी व्यक्त केली. पोलिसांनी वृद्धाचा मृतदेह ताब्यात घेऊन शवविच्छेदनासाठी पाठवला आणि त्यानंतर कुटुंबीयांच्या ताब्यात दिला. दयाराम शेती करायचे. पत्नीच्या मृत्यूनंतर त्यांचे मुलांसोबत मतभेद झाले. त्यामुळे त्यांनी शेतात घर बांधून त्यातच वास्तव्य केलं.