रेल्वेत नॉनवेज: शाकाहारी तरुणाची कोर्टात याचिका

अहमदाबाद

रेल्वेत प्रवाशांना मांसाहारी जेवण दिलं जात असल्याच्याविरोधात एका शाकाहारी तरुणाने गुजरात हायकोर्टात याचिका दाखल केली आहे. भारतीय रेल्वे प्रशासनानं रेल्वेत मांसाहारी जेवण देऊ नये किंवा मांसाहारी आणि शाहाकारी प्रवाशांना बसण्यासाठी वेगवेगळी व्यवस्था करावी, अशी मागणी याचिकाकर्त्यानं केली आहे.

याचिका दाखल करणारे ई.ई.सय्यद हे स्वत: वकील आहेत. राजधानी एक्स्प्रेसने प्रवास करतेवेळी त्यांच्यासमोरील प्रवाशाला नॉनवेज जेवण देण्यात आलं होतं. सय्यद हे शाकाहारी असल्यानं सोबतचा प्रवाशाला मांसाहार करताना पाहून त्यांना अवघडल्यासारखं झालं. ' शाकाहारी प्रवाशांना रेल्वेतून प्रवासकरतेवेळी नॉनवेज खाणारे प्रवासीपाहून अनेकदा अवघडल्यासारखं होतं. त्यामुळे यावर रेल्वेने तोडगा काढायला हवा', असं सय्यद यांनी म्हटलं आहे.

'संविधानातील आर्टीकल २१ आणि २५ नुसार प्रत्येक व्यक्तीला आपल्या खाण्यापिण्याच्या निवडीचा अधिकार आहे. पण त्यातून दुसऱ्याला अवघडल्यासारखं वाटतं कामा नये. त्यामुळे या समस्येवर रेल्वेने तोडगा काढण्याची गरज आहे', अशी मागणी सय्यद यांनी केली आहे. सय्यद यांच्या याचिकेवर पुढील आठवड्यात गुजरात हायकोर्टात सुनावणी होण्याची शक्यता आहे.