हुंड्यासाठी त्यानं काढला पत्नीचा बाथरूम व्हिडिओ

मटा ऑनाइन वृत्त। लखनऊ

हुंड्याच्या लोभापायी एका विकृत इसमानं स्वत:च्या बायकोचा आंघोळ करतानाचा व्हिडिओ काढून तिला ब्लॅकमेल केल्याचा प्रकार उघडकीस आला आहे. पीडित महिलेनं या प्रकरणी तक्रार दाखल केल्यानंतर पोलिसांनी तिच्या पतीविरोधात गुन्हा दाखल केला आहे.

पती-पत्नीच्या नात्याला काळिमा फासणारी ही घटना उत्तर प्रदेशची राजधानी लखनऊ इथं घडली आहे. पीडित महिलेच्या तक्रारीनुसार, लग्नानंतर काही महिन्यांतच तिचा नवरा तिला हुंड्यासाठी त्रास देऊ लागला. मात्र, तिनं हुंडा देण्यास नकार दिला. त्यामुळं संतापलेल्या तिच्या पतीनं एक दिवस तिचा आंघोड करतानाचा व्हिडिओ काढला आणि तिला ब्लॅकमेल करायला सुरुवात केली.

पीडित महिलेचा पती व्यापारी आहे. मागील फेब्रुवारी महिन्यात या दोघांचं लग्न झालं होतं. तिच्या वडिलांनी लग्नाला ३० लाख रुपये खर्च करूनही लग्नानंतर काही महिन्यातच पतीने आणखी १० लाख रुपयांची मागणी सुरू केली व तिच्यावर घर सोडून जाण्यासाठी दबाव टाकू लागला. घरातील काहींनी मध्यस्थी केल्यानं काही काळ सर्व सुरळीत सुरू होतं. मात्र, काही दिवसांनंतर त्यानं पुन्हा हुंड्यासाठी तगादा लावला. बायकोला हुंडा देण्यास भाग पाडावं म्हणून त्यानं बाथरूममध्ये कॅमेरा लावला व बायकोचा आंघोळ करतानाचा व्हिडिओ शूट केला. १० लाख रुपये दे नाही तर व्हिडिओ व्हायरल करेन, अशी धमकी तो बायकोला देत होता. या प्रकरणी पोलीस अधिक चौकशी करीत आहेत.