पत्नीचं अकाऊंट हॅक केलं म्हणून पतीला अटक

मटा ऑनलाइन वृत्त । गुडगाव

सततच्या भांडणांमुळे आपल्यापासून वेगळ्या राहणाऱ्या पत्नीचे फेसबुक अकाऊंट हॅक केल्याप्रकरणी गुडगावमधील एका व्यक्तीला अटक करण्यात आली आहे. सचिन जिंदाल असं त्याचं नाव असून पत्नीनं हॅकिंगची तक्रार नोंदवल्यानंतर तो पोलिसांच्या जाळ्यात सापडला.

सचिन जिंदाल हा गुडगाव येथे राहतो. पत्नीसोबत त्याचे सतत भांडण व्हायचे. त्यामुळे पत्नीने त्याच्यापासून वेगळे राहण्याचा निर्णय घेतला. ती गुडगाव सेक्टर ९(ए) मध्ये राहण्यास गेली. पत्नीवर असलेल्या रागापायी त्याने तिचे अकाऊंट हॅक केले आणि तिच्या मैत्रिणींना आक्षेपार्ह मेसेज पाठवू लागला. अकाऊंट हॅक झाल्याचा संशय आल्यानंतर त्याच्या पत्नीनं पोलिसात तक्रार दाखल केली. सचिननेच तिचे अकाऊंट हॅक केल्याचे तपासात उघड झाले. त्यामुळे ६६ (अ) माहिती तंत्रज्ञान कायद्याखाली त्याला फरिदाबाद येथून अटक करण्यात आली, असे पोलीस उपायुक्त हवा सिंह यांनी सांगितले.