हत्येनंतर महिलेचा स्तन कापून बॅगेत भरून नेला

मटा ऑनलाइन वृत्त | केरळ

केरळमधील इडुकी येथे मंगळवारी संध्याकाळी ४१ वर्षांच्या महिलेची निर्घृण हत्या करण्यात आली. धक्कादायक बाब म्हणजे मृत महिलेचा स्तन कापलेला होता. या प्रकरणी पोलिसांनी थोदुपुझा येथील ३० वर्षांच्या तरुणाला अटक केली आहे. सलीना असे मृत महिलेचे नाव असून ती अडिमली येथील रहिवासी अब्दुल सियादची पत्नी असल्याची माहिती मिळाली आहे.

पोलिसांच्या माहितीनुसार, सलीना ही समुपदेशक म्हणून काम करायची. आरोपी गिरीशविरोधात विनयभंगाचा गुन्हा दाखल आहे. याच प्रकरणातून सलीना आणि गिरीशची ओळख झाली होती. त्यावेळी सलीनाने त्याच्याकडून १ लाख ८ हजार रुपये घेतले होते. पण ते पैसे तिने परत केले नाहीत. तसेच गिरीशने तिच्यासाठी हप्त्यावर कारही खरेदी केली होती. पण तिने त्याचे हप्तेही वेळेवर फेडले नाहीत. गिरीशला पैशांची खूपच गरज होती. सलीनाला दिलेले पैसे घेण्यासाठी तो तिच्या घरी गेला. त्यावेळी तिने पैसे परत करण्यास नकार दिला. याच रागातून त्याने तिची हत्या केली. तसेच तिचा स्तन कापून तुकडे केले आणि बॅगमध्ये भरून तो घरी परतला. आरोपी गिरीश सलीनाच्या घरी आल्याचे तेथील दुकानातील सीसीटीव्ही कॅमेऱ्यातील फुटेजमधून स्पष्ट झाले आहे. या घटनेची अधिक चौकशी करण्यात येत असल्याचे पोलिसांनी सांगितले.