मित्रासोबत पैज लावली अन् बायको गमावली

मटा ऑनलाइन वृत्त । जयपूर

जयपूरमध्ये एक निंदाजनक प्रकार घडला आहे. आपल्या मित्रासोबत लावलेल्या पैजेत एका मुस्लिम व्यक्तीने पत्नीला गमावले आणि 'निकाह हलाला'नुसार तिला त्याच्यासोबत सेक्स करण्यासही भाग पाडले. याप्रकरणी ४२ वर्षीय पीडित महिलेने पती आणि त्याच्या मित्राविरोधात बलात्काराची तक्रार दाखल केली आहे.

निकाह हलाला म्हणजे काय?

पतीसोबत एखाद्या महिलेचा घटस्फोट झाला असेल आणि तिला पुन्हा पतीसोबत राहायचे असेल तर तिने दुसऱ्या पतीशी किंवा संबंधित व्यक्तीशी एकदा तरी शरीरसंबंध ठेवायला हवा.

'माझ्यासाठी हा सगळा प्रकार किळसवाणा आणि घृणास्पद होता. पतीसमोरच त्याच्या मित्राने माझ्यावर बलात्कार केला. मला प्रचंड चिड येतेय. वैफल्य आलंय आणि भीतीही वाटतेय', असं सांगत पीडित महिलेने घडल्या प्रकाराबद्दल मन मोकळं केलं.

पीडित महिलेचा पती हा एक प्रॉपर्टी एजंट आहे. 'निकाह हलाला' हा प्रकार योग्यच असल्याचा दावा त्याने केला आहे. 'आपला पती (वय ५०) नात्यातलाच आहे. लग्नाच्या २५ वर्षानंतर त्याने घटस्फोट घेतला. आम्हाला दोन मुलंही आहेत, असं पीडित महिलेने सांगितलं.

'त्याच्या मित्रासोबत सेक्स करावा यासाठी पती कायम माझ्यावर दबाव आणत होता. आणि मी त्याला सतत नकार देत होते. एक दिवस पती चिडला आणि त्याने मला तलाक दिला. पण तरीही पती माझ्यासोबत राहत होता आणि सर्व संबंध कायम होते. फिरायला नेण्याच्या बहाण्याने एके दिवशी म्हणजे ५ ऑगस्टला पती आपल्याला त्याच्या मित्राच्या घरी घेऊन गेला. मला काही गोळ्या दिल्या आणि त्यानंतर काही सुचेनासं झालं. मी उठले त्यावेळी विवस्त्र होते आणि पतीचा मित्र बाजूला होता. आरडा-ओरडा केल्यानंतर पती धावत आला आणि हा प्रकार कुणालाही सांगू नको, असं धमकावलं. असा हा घडलेला प्रकार पीडित महिलेने कथन केला.

पीडित महिलेने गप्प न बसता थेट पोलीस ठाण्यात पती आणि त्याच्या मित्राविरोधात तक्रार दाखल केली. तसंच मुस्लिम हक्क कार्यकर्त्यांकडे मदतीची मागणी केली. पोलीस ठाण्यात तक्रार दाखल करायला जात असताना पीडित महिलेला तिच्या पतीने त्याच्या मित्रासोबतची व्हिडिओ क्लिप दाखवून तिला धमकावले होते. तरीही तिने न डगमगता दोघांविरोधात पोलिसात बलात्काराची तक्रार दाखल केली. 'पतीच्या मित्रासोबत कुठलाही निकाह झालेला नाही आणि हा हलालाचाही प्रकार नाही. हा बलात्कार आहे', असं पीडित महिला म्हणाली.