सेक्सला नकार दिल्याने गुप्तांगावर अॅसिड फेकले

मटा ऑनलाइन वृत्त। कानपूर

शरीरसंबंधांसाठी नकार दिला या कारणावरून पतीने आपल्या पत्नीच्या गुप्तांगावर अॅसिड फेकल्याची संतापजनक घटना उत्तर प्रदेशातील कन्नौज जिल्ह्यात घडली आहे. घडलेल्या घटनेनंतर पीडित महिलेच्या माता-पित्यांनी पोलीस ठाण्यात तक्रार दाखल केल्यानंतर ही पत्नीवरील अत्याचाराची घटना उघड झाली.

पीडित महिला बहरीन गावातील रहिवाशी आहे. या घटनेनंतर पीडित महिलेला जिल्हा रुग्णालयात दाखल करण्यात आले आहे. पीडित महिलेने घडलेल्या घटनेबाबत दिलेल्या माहितीनुसार महिलेच्या पतीने पीडित महिलेच्या पतीने बळजबरीने शारीरिक संबंध ठेवण्याचा प्रयत्न केला. पीडितेला मात्र शारीरिक संबंध नको होते. यानंतर संतापून पतीने पीडितेच्या गुप्तांगावरच अॅसिड ओतले. अॅसिडने भाजल्यामुळे पीडित महिलेची स्थिती गंभीर आहे.

पीडित महिलेचा विवाह सुमारे ६ वर्षांपूर्वी झाला होता. ती पती आणि दोन मुलांसह बहरीन गावात राहत होती. बहरीन हा गाव कोतवाली पोलीस ठाण्यांतर्गत येतो.

कन्नौजचे पोलीस अधीक्षक हरिश्चंद्र यांनी दिलेल्या माहितीनुसार, या प्रकरणात आरोपीसह इतर तिघांविरोधातही विविध कलमांखाली गुन्हे दाखल करण्यात आले आहेत. इतर आरोपींना अटक करण्यासाठी विविध ठिकाणी छापे टाकण्यात येत असल्याची माहितीही हरिश्चंद्र यांनी दिली.