वृत्तसंस्था, नवी दिल्ली
अस्वस्थ वाटू लागल्याने रविवारी रात्री येथील एम्स रुग्णालयात दाखल करण्यात आलेले माजी पंतप्रधान आणि काँग्रेसचे ज्येष्ठ नेते मनमोहन सिंग यांची प्रकृती स्थिर आहे. रुग्णालयातील सूत्रांनी सोमवारी ही माहिती दिली. नवीन औषधाची रिअॅक्शन होऊन ताप आल्याने मनमोहन यांना रुग्णालयात निरीक्षणाखाली ठेवण्यात आले असल्याची माहिती सूत्रांनी दिली.
नवीन औषधाची तीव्र रिअॅक्शन झाल्याने मनमोहन सिंग (८७) यांना रविवारी रात्री एम्समध्ये दाखल करण्यात आले. त्यांना अन्य कोणत्या कारणामुळे ताप येत आहे का हे पाहण्यासाठी त्यांची तपासणी सुरू असून त्यांना रुग्णालयाच्या कार्डिओथोरॅसिक विभागात निरीक्षणाखाली ठेवले असल्याचे सूत्रांनी सांगितले. डॉक्टरांचे एक पथक त्यांची योग्य ती काळजी घेत असल्याचे मनमोहन सिंग यांच्या निकटवर्तीयांनी सांगितले. २००९ मध्ये मनमोहन सिंग यांच्यावर एम्समध्येच कोरोनरी बायपास शस्त्रक्रिया करण्यात आली होती. मनमोहन यांना रुग्णालयात दाखल करण्यात आल्याचे वृत्त समजताच सर्वपक्षीय नेत्यांनी त्यांच्या प्रकृतीबद्दल चिंता व्यक्त केली असून त्यांना लवकर बरे वाटावे, अशा शुभेच्छा दिल्या आहेत.