क्रूर नक्षलींनी जवानांची गुप्तांगं कापली

मटा ऑनलाइन वृत्त । रायपूर

छत्तीसगडमधील सुकमा जिल्ह्यात नक्षलवाद्यांनी सीआरपीएफ जवानांवर केलेल्या हल्ल्यात कौर्याचा कळस गाठलाय. नक्षलवाद्यांनी काही जवानांची गुप्तांगं कापली, काहींचे गळे चिरले तर काही जणांची डोकी चिरडल्याची धक्कादायक माहिती समोर आली आहे.

रस्ताबांधणीच्या कामाची पाहणी करण्यासाठी नियुक्ती केलेल्या केंद्रीय राखीव सुरक्षा दलाच्या (सीआरपीएफ) ताफ्यावर सोमवारी सुमारे ३०० ते ४०० शस्त्रसज्ज नक्षलींनी हल्ला चढवला होता. सुमारे तीन तास चाललेल्या या तुंबळ चकमकीत २५ जवान शहीद झाले होते, तर सात जण गंभीर जखमी आहेत. या हल्ल्याबाबतची नवनवी माहिती रोज उजेडात येत असताना, नक्षलींनी शहिदांची विटंबना केल्याचा भीषण पुरावाच सापडला आहे.

नक्षली हल्ल्यातील शहीद जवानांचे मृतदेह आणण्यासाठी सुरक्षा पथक घटनास्थळी पोहोचलं, तेव्हा बऱ्याच जवानांची गुप्तांगं कापल्याचं त्यांच्या लक्षात आलं. स्थानिक आदिवासींची सहानुभूती मिळवण्यासाठी त्यांनी हा अमानुषपणा केला असावा, असा पोलिसांचा अंदाज आहे. सुरक्षा जवानांकडून तुमच्यावर होत असलेल्या अत्याचाराचा आम्ही बदला घेतला आहे, त्यामुळे तुम्ही त्यांना मदत कराल तर खबरदार, असाच काहीसा इशारा त्यांनी गावकऱ्यांना या दिला असू शकतो. सोबतच, जवानांमध्येही आपली दहशत निर्माण करण्यासाठी त्यांनी हा क्रूरपणा केला असेल, असं बोललं जातंय.

दरम्यान, यापूर्वी २००७ मध्ये छत्तीसगडच्या बीजापूरमधील छावणीवर केलेल्या हल्ल्यात शहीद झालेल्या जवानांचे हात, पाय नक्षलवाद्यांनी कापले होते, अशी माहिती एका वरिष्ठ पोलीस अधिकाऱ्याने टाइम्स ऑफ इंडियाला दिली. त्या हल्ल्यात ५५ जवान शहीद झाले होते. त्यांच्या शरीरात बॉम्ब लावून आणखी मोठ्या घातपाताचा कट त्यांनी रचला होता. सुदैवानं, मदत आणि बचाव पथकाच्या प्रसंगावधानामुळे तो उधळला गेला होता.