बेळगावात पुन्हा मराठी महापौरच?

मटा ऑनलाइन वृत्त । बेळगाव

महापौर आणि उपमहापौरपदाची निवडणूक बुधवारी होणार असून मराठी भाषिकांचे झालेले दोन गट एकत्र येऊन पुन्हा मराठीच महापौर करण्याची तयारी झाली असल्याचे खात्रीलायक वृत्त आहे.

मराठी भाषिकांत २२ नगरसेवकांचा एक आणि १० नगरसेवकांचा एक असे गट झाले होते. त्यामुळे महापौरपदाच्या निवडणुकीत काय होणार, याची धाकधूक सगळ्यांना होती. पण आज रात्री दोन्ही गट अज्ञात स्थळी एकत्र येणार असून मराठी गटाचे महापौर आणि उप महापौर पदाचे उमेदवार निश्चित करण्याचा अधिकार आमदार संभाजी पाटील याना मराठी भाषिक नगरसेवकांनी दिला आहे.

रात्री दोन्ही गट एकत्र आल्यावर महापौर आणि उप महापौरपदाचे मराठी भाषिकांचे उमेदवार निश्चित होणार आहेत. मराठी भाषिक गटातून महापौर पदासाठी संज्योत बांदेकर आणि मधुश्री पुजारी यांच्या नावांची आणि उप महापौर पदासाठी विनायक गुंजटकर यांच्या नावाची सध्या चर्चा सुरू आहे. कन्नड उर्दू गटही दांडेली येथील रिसॉर्टमध्ये असून तो गटही थेट निवडणुकीवेळी महानगरपालिकेत येणार आहे.

महापौरपद ओबीसी महिलांसाठी राखीव असून उप महापौरपद खुले आहे. महानगरपालिकेत सकाळी दहा ते अकरा या वेळेत उमेदवारी अर्ज दाखल करायचा असून दुपारी एक वाजता अर्जाची छाननी झाल्यावर मतदान होणार आहे. निवडणूक निर्णय अधिकारी म्हणून प्रभारी प्रादेशिक आयुक्त एन. जयराम उपस्थित राहणार आहेत.