​ लक्षात ठेवा, टॅटू गोंदवाल तर 'ही' नोकरी गमवाल!

नवी दिल्ली: शरीरावर टॅटू गोंदवल्यास भारतीय हवाई दलातील नोकरी जाऊ शकते किंवा ती मिळू शकणार नाही. होय हे खरंय. एका कर्मचाऱ्यानं हातावर टॅटू गोंदवल्यानं भारतीय हवाई दलानं त्याची नियुक्ती रद्द केली होती. हवाई दलाचा हा निर्णय दिल्ली उच्च न्यायालयानं कायम ठेवला आहे.

न्यायाधीश हिमा कोहली आणि रेखा पाटील यांच्या खंडपीठासमोर या प्रकरणाची सुनावणी झाली. टॅटूमुळं संबंधित कर्मचाऱ्याची नियुक्ती रद्द करण्याचा हवाई दलाचा निर्णय खंडपीठानं कायम ठेवला. या कर्मचाऱ्यानं अर्जासोबत हातावर काढलेल्या टॅटूचा फोटोही जोडला नव्हता. याशिवाय हवाई दलानं प्रसिद्ध केलेल्या जाहिरातीत यासंबंधी स्पष्ट निर्देश दिले होते, असं खंडपीठानं हा निर्णय देताना सांगितलं.

आदिवासी उमेदवारांना अशा प्रकारचे टॅटू काढण्याची परवानगी आहे. कारण त्यांनी आपल्या समाजाच्या चालीरिती आणि परंपरेनुसार ते शरीरावर गोंदवले आहेत, असं हवाई दलाच्या वकिलांनी स्पष्ट केलं. उमेदवारांच्या निवडीचा किंवा निवड न करण्याचा अधिकार केवळ निवड समितीला आहे, असंही वकिलांनी सांगितलं.

तत्पूर्वी, नियुक्ती रद्द करण्याच्या हवाई दलाच्या निर्णयाला संबंधित कर्मचाऱ्यानं न्यायालयात याचिकेद्वारे आव्हान दिलं होतं. हवाई दलानं नियुक्ती पत्र जारी केल्यानंतर एका प्रमाणपत्रात शरीरावर टॅटू गोंदवल्याची माहिती दिली होती. तसंच अधिकाऱ्यांपासून आपण कोणतीही माहिती लपवून ठेवली नाही, असं म्हणणं त्यानं याचिकेत मांडलं होतं. मात्र, न्यायालयानं त्याचं म्हणणं अमान्य करत याचिका फेटाळून लावली.