भाजपला मुस्लिम मतं मिळालीच कशी?: मायावती

मटा ऑनलाइन वृत्त । लखनऊ

उत्तर प्रदेशच्या विधानसभा निवडणुकीतील दारुण पराभवामुळं निराश झालेल्या बहुजन समाज पक्षाच्या नेत्या मायावती यांनी भाजपच्या विजयावरच संशय व्यक्त केला आहे. 'यूपीतील मुस्लिमबहुल भागात भाजपला मत मिळालीच कशी,' असा सवाल करताना, 'भाजपनं इलेक्ट्रॉनिक मतदानयंत्रात घोळ केल्यामुळंच हे घडलं आहे,' असा आरोप त्यांनी केला.

उत्तर प्रदेशातील सर्व ४०३ जागांवरील निकालांचे कल जाहीर झाले असून त्यात भाजपनं निर्विवाद बहुमताचा आकडा ओलांडला आहे. तर, समाजवादी पक्ष, काँग्रेस व बसपला जोरदार फटका बसला आहे. दलित, मुस्लिम मतांची मोट बांधून सोशल इंजिनिअरिंग करू पाहणाऱ्या मायावतींचा पक्ष तिसऱ्या क्रमांकावर फेकला गेला आहे. निकालाचं चित्र स्पष्ट होताच मायावती यांनी आज तातडीनं पत्रकार परिषद घेत भाजपवर घोटाळ्याचा आरोप केला. 'मुस्लिमबहुल मतदारसंघातही भाजपला मतं मिळाली आहेत. हा इव्हीएम मशिनमधील घोळाचा पुरावा आहे. एकतर इतर पक्षांची मतं भाजपला गेली असावीत किंवा लोकांनी इतर पक्षांना दिलेली मतं इव्हीएम मशिननं स्वीकारलीच नसावीत,' अशी शंका मायावती यांनी व्यक्त केली. 'निवडणुकीआधी एका पत्रकारानं मला इव्हीएम मशिनमध्ये मतांची फेरफार होत असल्याचं सांगितलं होतं. आम्ही त्याकडं दुर्लक्ष केलं. पण आज त्याचंच म्हणणं खरं ठरलं, असं सांगून, 'हिंमत असेल तर अमित शहा यांनी पुन्हा निवडणुका घ्याव्यात. माझा आरोप सिद्ध होईल,' असं मायावती म्हणाल्या.

'महाराष्ट्रातही इव्हीएम मशिनविरोधात तक्रारी होत्या. यूपीतही तेच झालं आहे. त्यामुळं याबद्दल मी मुख्य निवडणूक आयुक्तांना पत्र लिहिणार आहे. भविष्यात अशाच पद्धतीनं निवडणुका झाल्या तर लोकशाहीच धोक्यात येईल,' अशी भीतीही मायावती यांनी व्यक्त केली.