मायावती आज दिल्लीत, पुढील रण‌नीती ठरविणार

वृत्तसंस्था, लखनौ
राज्यसभा सदस्यत्वाचा राजीनामा दिल्यानंतर बहुजन समाज पक्षाच्या सर्वेसर्वा मायावती यांनी पुढील रणनीती ठरविण्यासाठी रविवारी नवी दिल्लीत पक्षाच्या वरिष्ठ नेत्यांची बैठक बोलावली आहे. पक्षाचे सर्व समन्वयक, विधानसभा व विधान परिषदेचे सदस्य आणि राज्यसभा सदस्यांना या बैठकीस आमंत्रित करण्यात आले आहे, अशी माहिती पक्षाच्या नेत्यांनी दिली.
दलितांवर होणाऱ्या अत्याचाराबद्दल सभागृहात बोलू दिले जात नसल्याचा आरोप करून मायावती यांनी नुकताच राज्यसभा सदस्यत्वाचा राजीनामा दिला आहे. त्यानंतर आता पक्षाची पुढील रणनीती काय असावी, या वातावरणाचा कसा सामना करावा याबद्दल मायावती या बैठकीत पक्षनेत्यांना सूचना करणार असल्याचे समजते. ‘मायावती यांनी ज्या कारणाने राज्यसभा सदस्यत्वाचा राजीनामा दिला, ते कारण तळागाळातील कार्यकर्त्यांपर्यंत, पाठीराख्यांपर्यंत पोहोचविण्याचा प्रयत्न करण्यात येणार आहे. बहुजन समाजाची प्रतिष्ठा आणि सन्मान जपून मायावतींनी राजीनामा दिला असून, आता त्यांच्या रणनीतीनुसार काम करणे हे सर्व नेत्यांचे कर्तव्य आहे,’ असे ‘बसप’च्या एका नेत्याने नाव जाहीर न करण्याच्या अटीवर सांगितले.
मायावती या त्यांच्या राजीनाम्यानंतर पक्षनेत्यांच्या प्रतिक्रिया जाणून घेणार आहेत. तसेच, त्या आपल्या पाठीराख्यांशी थेट संवाद साधण्यासाठी रॅलीचे आयोजन करतील, अशी शक्यता आहे. मायावतींच्या राजीनाम्यामुळे त्या आता पूर्ण वेळ पक्ष संघटनेसाठी वेळ देऊ शकतील
म्हणून कार्यकर्त्यांमध्ये आनंदाचे वातावरण आहे, असेही या नेत्याने सांगितले.