'या' शाहरुख-सलमानला भेटलात का?

नवी दिल्ली:
सलमान खान आणि शाहरुख खान म्हटलं की आपल्या डोळ्यांसमोर बॉलिवूडची खान जोडगोळी येते. पण हे सुपरस्टार बॉलिवूडचे नव्हेत, ते आहेत क्रिकेटपटू! स्थानिक क्रिकेट संघात हे दोघे जण दोन वेगवेगळ्या राज्यांचं प्रतिनिधित्व करतात. सलमान फारुक खान हा २० वर्षीय क्रिकेटर राजस्थानमधील झालावर येथील आहे. मसूद शाहरुख खान हा २४ वर्षीय क्रिकेटपटू चेन्नईचा आहे. तो तामिळनाडूचं प्रतिनिधित्व करतो.

टाइम्स ऑफ इंडियाला दिलेल्या विशेष मुलाखतीत या दोघांनी त्यांच्या नावांची पार्श्वभूमी सांगितली. 'माझी मावशी शाहरुखची जबरदस्त फॅन आहे. ती माझ्या आईला नेहमी म्हणायची की तुला मुलगा झाला तर त्याचं नाव शाहरुख खान ठेव,' शाहरुख म्हणाला.

सलमानचं नाव अभिनेत्या सलमानवरून ठेवलेलं नाही. याविषयी तो सांगतो,'माझ्या वडिलांनी माझं नाव ठेवलं. त्यांना सलमान या शब्दाचा अर्थ खूप आवडतो. सलमान म्हणजे सुरक्षित.' हे दोघेही खालच्या फळीत खेळतात.

शाहरुखने डिसेंबर २०१८ मध्ये प्रथम श्रेणी क्रिकेटमध्ये पदार्पण केलं. रणजी ट्रॉफीसाठी त्याला केरळ वि. चेन्नई सामन्यात खेळण्याची संधी मिळाली तेव्हा त्याने पहिल्या डावात ९२ तर दुसऱ्या डावात ३४ धावा केल्या. सलमानने रणजीच्या पदार्पणाच्या सामन्यातच ११० धावांची शतकी खेळी केली होती. विशेष म्हणजे राहुल चहरने देखील याच सामन्यातून पदार्पण केले होते.