मेहुल चोक्सीचं अँटिग्वाच नागरिकत्व रद्द होणार

नवी दिल्लीः

पंजाब नॅशनल बँकेत झालेल्या घोटाळ्याचा प्रमुख सूत्रधार मेहुल चोक्सी याचे अँटिग्वामधील नागरिकत्व रद्द होणार आहे. मेहुल चोक्सीच्या प्रत्यार्पणासाठी कॅरेबियन देशावर भारताकडून दबाव आणला जात आहे. याचाच एक भाग म्हणून आता चोक्सी यांचे नागरिकत्व रद्द करण्याचा निर्णय तेथील सरकारने घेतला आहे.

यासंदर्भात बोलताना अँटिग्वाचे पंतप्रधान म्हणाले की, कोणत्याही आरोपीला अँटिग्वा संरक्षण देऊ शकत नाही. यावर भारताकडून कोणतीही प्रतिक्रिया आलेली नाही. अँटिग्वाच्या निर्णयाबद्दल माहिती नाही. त्यामुळे याविषयी कोणतीही प्रतिक्रिया देऊ इच्छित नाही, असे परराष्ट्रमंत्री एस. जयशंकर यांनी सांगितले.

मेहुल चोक्सीच्या प्रत्यार्पणासाठी भारताकडून सतत प्रयत्न सुरू आहेत. मेहुल चोक्सी आजारी असल्यास त्यांना हवाई रुग्णवाहिकेतून भारतात आणण्याचा प्रस्ताव तपास यंत्रणांकडून देण्यात आला होता. प्रकृती अस्वास्थामुळे भारतात परतण्याबाबत इच्छूक नसल्याचे चोक्सीकडून सांगण्यात आले.