गोवा: एमजीपी काँग्रेससोबत, भाजपचा पाठिंबा काढणार

पणजी: लोकसभा निवडणुकीत काँग्रेसला पाठिंबा दिल्यानंतर महाराष्ट्रवादी गोमंतक पार्टीने (एमजीपी) गोव्यातील भाजप सरकारचा पाठिंबा काढून घेण्याची घोषणा केली आहे. एमजीपीचे कार्यकारी अध्यक्ष दीपक ढवळीकर यांनी ही घोषणा केली आहे.

एमजीपीच्या केंद्रीय समितीने गुरुवारी लोकसभा निवडणुकीत काँग्रेसला पाठिंबा देण्याची घोषणा केली होती. त्यानंतर लगेचच दीपक ढवळीकर यांनी गोव्यातील भाजप सरकारचा पाठिंबा काढत असून त्याबाबतचं पत्र राज्यपालांना देण्यात येणार असल्याचं जाहीर केलं. एमजीपीने २०१२मध्ये भाजपसोबत युती केली होती. त्यापूर्वी एमजीपी ५ वर्ष काँग्रेससोबत होती.

गोव्याचे माजी मुख्यमंत्री मनोहर पर्रिकर यांच्या निधनानंतर एमजीपीने भाजपला पाठिंबा दिला होता. त्यामुळे एमजीपीचे ज्येष्ठ नेते सुदीन ढवळीकर यांना उपमुख्यमंत्री बनविण्यात आले होते. मात्र ढवळीकर यांच्या पक्षाचे दोन्ही आमदार भाजपमध्ये सामिल झाल्याने ढवळीकर यांना उपमुख्यमंत्रीपद गमवावं लागलं होतं.

दरम्यान, एमजीपीने पाठिंबा काढून घेतला तरी भाजप सरकारला काहीही फरक पडणार नाही. भाजपकडे १४ आमदार आहेत. त्यांना गोवा फॉरवर्ड पार्टीच्या तीन आणि तीन अपक्षांचा पाठिंबा आहे. गोव्यात बहुमतासाठी १९ सदस्य संख्या अवश्यक असून भाजपकडे २० सदस्य असल्याने भाजप सरकार स्थिर असल्याचं सूत्रांनी सांगितलं.