दिल्लीत धुके: ४०० गाड्या उशिराने, १५ रद्द

नवी दिल्ली: आज नव्या वर्षाच्या पहिल्या दिवशी दिल्ली आणि परिसरात पसरलेल्या दाट धुक्यामुळे लांब पल्ल्यांच्या तब्बल ४०० गाड्या आपल्या गंतव्य स्थानी निर्धारित वेळेपेक्षा उशिराने पोहोचल्या. याबरोबर दाट धुक्याचा परिणाम विमानांच्या तब्बल ३०० उड्डाणांवरही जाणवला.

रेल्वेने प्रसिद्ध केलेल्या अधिकृत आकडेवारीनुसार, ३१ डिसेंबरच्या मध्यरात्री धुक्यामुळे ४०० लांब पल्ल्याच्या गाड्या आपल्या गंतव्यस्थानी उशिराने पोहोचल्या. आज सकाळी ६.३० वाजता ५६ गाड्या उशिराने पोहोचल्या, तर २० गाड्यांचे नवे वेळापत्रक तयार करावे लागले. धुक्यामुळे एकूण १५ गाड्या रद्द करण्याच आल्या. दिल्लीतील आजचे किमान तापमान ५.७ सेल्सियस, तर कमाल २० डिग्री सेल्सियस इतके नोंदवण्यात आले.

पाटणा राजधानी एक्स्प्रेस, पूर्वा एक्स्प्रेससह अनेक गाड्या१२ तास उशिराने धावत होत्या.तर रीवा एक्स्प्रेस आणि मगध एक्स्प्रेस निर्धारित वेळेपेक्षा ११ तास उशिराने धावत होत्या.

आयजीआय विमानतळावर दृश्यता कमी असल्यामुळे ३००हून अधिक उड्डाणे उशिराने झाली, तर ८ उड्डाणे रद्द करण्यात आली. उद्या (मंगळवार) देखील दिल्ली-एनसीआरमध्ये सकाळी आणि संध्याकाळी दाट धुके पसरलेले असेल असे हवामान तज्ञांनी सांगितले आहे.