मोबाइल महागणार, जीएसटी १२ टक्क्यांवरून १८ टक्क्यांपर्यंत

वृत्तसंस्था, नवी दिल्लीः मोबाइल फोनवरील वस्तू व सेवा करात (जीएसटी) शनिवारी जीएसटी परिषदेने वाढ केल्याने हे फोन महागण्याची चिन्हे आहेत.

केंद्रीय अर्थमंत्री निर्मला सीतारामन यांच्या अध्यक्षतेखाली शनिवारी झालेल्या जीएसटी परिषदेत मोबाइल फोनवरील जीएसटी १२ टक्क्यांवरून १८ टक्क्यांपर्यंत वाढवण्यात आला आहे. हाताने बनवलेल्या काडेपेट्या व यंत्राद्वारे यांत्रिक पद्धतीने तयार केलेल्या काडेपेट्यांचा जीएसटी दर आता अनुक्रमे ५ टक्के व १८ टक्क्यांवरून १२ टक्के करण्यात आला आहे. हवाई क्षेत्राची सध्याची नाजूक स्थिती पाहून विमानांच्या दुरुस्तीवरील जीएसटी १८ टक्क्यांवरून ५ टक्क्यांपर्यंत कमी करण्यात आला आहे. यासोबतच व्यावसायिकांना दिलासा देत वार्षिक परतावा भरण्यासाठीची मुदत ३० जूनपर्यंत वाढवण्यात आली आहे.

यापूर्वीच्या जीएसटी परिषदेच्या बैठकीत इन्फोसिसचे अध्यक्ष नंदन निलेकणी यांनी जीएसटी दरबदलाबाबत विस्तृत विश्लेषण मांडले होते. त्यानुसार आयटी क्षेत्रासाठी बदल करण्याचाही निर्णय परिषदेने घेतला असल्याचे अर्थमंत्री सीतारामन यांनी स्पष्ट केले.