'कन्हैयाच्या रूपानं मोदींना तोड मिळालीय'

मटा ऑनलाइन वृत्त । नवी दिल्ली

देशातील कथित असहिष्णुतेचा निषेध करत मोदी सरकारविरोधात 'पुरस्कारवापसी' करणाऱ्या प्रसिद्ध लेखिका नयनतारा सहगल या जवाहरलाल नेहरू विद्यापीठातील (जेएनयू) स्टुडंट्स युनियनचा अध्यक्ष कन्हैया कुमार याच्या 'क्रांतिकारी' विचारांनी भारावून गेल्या आहेत. 'कन्हैया कुमारच्या रूपानं पंतप्रधान नरेंद्र मोदी यांना तोड मिळाली आहे,' असं सहगल यांनी म्हटलं आहे.

जेएनयूतील देशविरोधी घोषणाबाजी प्रकरणात अटक करण्यात आलेला कन्हैया कुमार सध्या अंतरिम जामिनावर आहे. जामिनावर सुटल्यानंतर त्यानं सर्वप्रथम जेएनयूच्या आवारात विद्यार्थ्यांसमोर भाषण केलं. त्यानंतर विविध वृत्तवाहिन्यांना मुलाखतीही दिल्या. त्यात त्यानं मोदी सरकारवर जाहीर तोफा डागल्या. कन्हैयाच्या या भाषणांमुळं नयनतारा सहगल प्रचंड प्रभावित झाल्या आहेत. 'कन्हैयानं त्याच्या समतोल, समंजस व राष्ट्रवादी विचारांनी देशात एक चैतन्य निर्माण केलं आहे. गेल्या काही दिवसांपासून आमच्यासारखे अनेक लोक नैराश्याच्या गर्तेत सापडले होते. त्यांना त्यातून बाहेर काढल्याबद्दल कन्हैयाचे आभार मानायला हवेत,' असं सांगतानाच, 'कन्हैयाच्या रूपानं मोदींना तोड मिळाली आहे,' असं त्यांनी म्हटलं आहे.

राजमोहन गांधी यांच्या 'अंडरस्टँडिंग द फाउंडिंग फादर्स' या पुस्तकाचे प्रकाशन करताना सहगल बोलत होत्या. 'सध्या इतिहास, शिक्षण व संस्कृतीची मोडतोड केली जात आहे. 'भारत' नावाची संकल्पनाच संकटात आहे. अशा परिस्थितीत प्रत्येक भारतीयानं आक्रमक झालं पाहिजे. उभं राहिलं पाहिजे, बोललं पाहिजे. त्याबद्दल कोणालाही काहीही स्पष्टीकरण देण्याची गरज नाही,' असंही त्यांनी सांगितलं.