राष्ट्रध्वजाचा अपमान; मोदींविरोधात गुन्हा

मटा ऑनलाइन वृत्त । पाटणा

राष्ट्रध्वजाचा अपमान केल्याप्रकरणी पंतप्रधान नरेंद्र मोदी यांच्याविरोधात गुन्हा दाखल करण्यात आला आहे. बिहारमधील मुझफ्फरपूर जिल्हा न्यायदंडाधिकाऱ्यांकडं गुन्ह्याची नोंद करण्यात आली असून या प्रकरणी १६ जुलै रोजी सुनावणी होणार आहे.

बिहारच्या पोखरायरा गावातील प्रकाश कुमार यांच्या तक्रारीवरून हा गुन्हा दाखल करण्यात आला आहे. गेल्या वर्षी २१ जून रोजी भारतासह जगभरात पहिला आंतरराष्ट्रीय योग दिन साजरा करण्यात आला. पंतप्रधान मोदी यांनी 'इंडिया गेट' येथे झालेल्या योग शिबिरात सहभाग घेतला होता. त्यावेळी त्यांनी भारताचा राष्ट्रध्वज असलेल्या तिरंगी झेंड्याचा एखाद्या फडक्याप्रमाणे वापर केला. ते तिरंग्यावर बसले आणि तिरंगी झेंड्याच्या कापडानंच त्यांनी तोंड व हात पुसले. हा राष्ट्रध्वजाचा अपमान असून त्यामुळं कोट्यवधी देशवासीयांच्या भावना दुखावल्या आहेत,' असा प्रकाश कुमार यांचा आरोप आहे. पुरावा म्हणून कुमार यांनी काही छायाचित्रेही न्यायालयाला दिली आहेत.