'मोदींच्या बोलण्याला काही अर्थच नसतो'

नवी दिल्ली: केंद्र सरकार व नागा बंडखोरांमध्ये २०१५साली झालेल्या सामंजस्य कराराच्या मुद्द्यावरून काँग्रेस अध्यक्ष राहुल गांधी यांनी पंतप्रधान नरेंद्र मोदींवर बोचऱ्या शब्दांत हल्ला चढवला आहे. 'मोदी हे देशाचे पहिलेच असे पंतप्रधान आहेत, ज्यांच्या वक्तव्याला, घोषणांना काही अर्थच नसतो,' अशी टीका राहुल यांनी केली आहे.

राहुल यांनी या संदर्भात एक ट्विट केलं आहे. '२०१५ मध्ये मोदींनी नागा करारावर स्वाक्षरी करून इतिहास घडवल्याचा दावा केला होता. मात्र, आज २०१८मध्येही नागालँडमध्ये या कराराचं प्रतिबिंब उमटलेलं दिसत नाही,' असं त्यांनी म्हटलं आहे.

ऑगस्ट २०१५ मध्ये केंद्र सरकारने नागालँडमधील 'नॅशनल सोशलिस्ट कौन्सिल ऑफ नागालँड' (इसाक-मुईवाह) या बंडखोर गटाबरोबरच्या ऐतिहासिक करारावर स्वाक्षऱ्या केल्या. 'पंतप्रधान नरेंद्र मोदी यांच्या या प्रयत्नांसाठी आम्ही नागा नागरिक सदैव ऋणी राहू. आता नव्या संबंधांचे पर्व सुरू होईल,' अशी भावनिक प्रतिक्रिया 'एनएससीएन'(आय-एम) या नागा बंडखोर गटाचे प्रमुख थ्युंगालेंग मुइवाह यांनी त्यावेळी व्यक्त केली होती. पंतप्रधानांनी तर या कराराला ऐतिहासिक करार असे संबोधले होते. त्याचाच संदर्भ देत राहुल यांनी हे टि्वट केलं आहे.

नागालँडमध्ये २७ फेब्रुवारीला विधानसभा निवडणुका होणार आहेत. मात्र, नागालँडमधील सहा बंडखोर संघटनांच्या नागा नॅशनल पॉलिटिकल ग्रुपनं (NNPG)नं या निवडणुकीवर बहिष्कार टाकण्याचे आवाहन केलं आहे. आधी नागा समस्येवर तोडगा काढा, अशी एनएनपीजीची मागणी आहे. निवडणूक प्रक्रिया सुरू होऊनही NNPGच्या दहशतीमुळं राजकीय पक्षांचे उमेदवार अर्ज भरत नसल्याचं चित्र आहे. या निवडणुकांसाठी केंद्र सरकारनं निमलष्करी दलाच्या २७० तुकड्या नागालँडमध्ये तैनात केल्या आहेत.