‘मोदीजी की सेना’ची निवडणूक आयोगाकडून दखल

वृत्तसंस्था, नवी दिल्ली

उत्तर प्रदेशचे मुख्यमंत्री योगी आदित्यनाथ यांनी भारतीय सैन्याचा 'मोदीजी की सेना' असा उल्लेख केल्यासंदर्भातील अहवाल गाझियाबादच्या जिल्हा दंडाधिकाऱ्यांनी निवडणूक आयोगाला सादर केला आहे. या वक्तव्यामुळे आदर्श आचारसंहितेचे उल्लंघन झाले आहे का, याची तपासणी सध्या सुरू आहे, अशी माहिती या घडामोडींची माहिती असलेल्या सूत्रांनी दिली.

'काँग्रेसचे लोक दहशतवाद्यांना बिर्याणी खायला घालतात आणि मोदीजींची सेना दहशतवाद्यांना गोळ्या घालते. हा फरक आहे. काँग्रेसचे लोक मसूद अझरला 'जी' म्हणून संबोधित करून दहशतवादाला खतपाणी घालतात,' असे उद्गार आदित्यनाथ यांनी गाझियाबाद येथे रविवारी काढले होते. तेथील विद्यमान खासदार, केंद्रीय मंत्री व्ही. के. सिंह यांच्या प्रचारासाठी आयोजित सभेत बोलताना त्यांनी हे वक्तव्य केले होते.

लोकसभा निवडणुकीच्या प्रचारादरम्यान संरक्षण दलाच्या कोणत्याही कारवाईचा उल्लेख करू नये, असे स्पष्ट निर्देश निवडणूक आयोगाने १९ मार्च रोजी सर्व राजकीय पक्षांना दिले होते. आपल्या प्रचारसाहित्यामध्ये संरक्षण दलातील जवानांची छायाचित्रे वापरू नयेत, असे आदेशही आयोगाने त्याआधी राजकीय पक्ष व उमेदवारांना दिले होते.

आदित्यनाथ यांच्या 'मोदीजी की सेना' वक्तव्यामुळे सैन्यदलातील अधिकारी तसेच निवृत्त अधिकारी यांनी नापसंती व्यक्त केल्याचे सांगत आदित्यनाथ यांच्याविरोधात निवडणूक आयोगाकडे जाणार असल्याचे निवृत्त नौदलप्रमुख अॅडमिरल अल. रामदास यांनी सोमवारी सांगितले होते.