'UP चा अर्थ 'अप', इथं तर सगळंच 'डाऊन'

मटा ऑनलाइन वृत्त । कन्नौज

उत्तर प्रदेशात तिसऱ्या टप्प्याच्या निवडणुकीचा प्रचार करताना पंतप्रधान नरेंद्र मोदी यांनी आज समाजवादी पार्टीवर जोरदार टीकास्त्र सोडले. 'युपी'चा अर्थ 'अप' असा होतो. पण इथे तर शिक्षण, आरोग्य आणि रोजगारसहीत अनेक गोष्टी 'डाऊन' आहेत. त्याला उत्तर प्रदेशातील सध्याचे सरकारच जबाबदार आहे, असा हल्ला नरेंद्र मोदी यांनी चढवला.

कन्नौजमध्ये १९ तारखेला मतदान होणार आहे. त्यानिमित्त आयोजित प्रचारसभेला संबोधित करताना नरेंद्र मोदी यांनी हे टीकास्त्र सोडले. काँग्रेसचा पाय समाजवादी पार्टी आणि बहुजन समाज पक्षात गुंतलेला आहे. या निवडणुकीत हे तिघे तीन पायांनी पळत आहेत. पण ते दोन पाय असलेल्या भाजपला हरवू शकत नाहीत, असं ते म्हणाले.

बापावर गोळ्या झाडणाऱ्यांसोबत अखिलेश

३ मार्च १९८४ रोजी काँग्रेसने मुलायमसिंह यादव यांच्यावर हल्ला चढविला होता. पण आज मुलानेच बापावर गोळीबार करणाऱ्यांशी हातमिळवणी केली आहे, अशी टीका मोदी यांनी केली.

आकाशात सेंच्युरी

अवकाशात १०४ उपग्रह सोडल्याचा उल्लेखही त्यांनी केला. आपल्या शास्त्रज्ञांनी अवकाशात सेंच्युरी ठोकली असल्याचं मोदी म्हणाले.

राहुल आणि बटाटे

यावेळी मोदी यांनी राहुल गांधी यांचे नाव न घेता त्यांच्यावर टीका केली. काँग्रेसचा एक नेता प्रचार करायला येत असतो. पण त्यांना बटाटे शेतात उगवतात की फॅक्ट्रीमध्ये हे सुद्धा माहित नाही, असा टोलाही त्यांनी लगावला.