शमीच्या पत्नीनं घातला घरात गोंधळ; अटकेनंतर सुटका

वृत्तसंस्था, अमरोहा (उत्तर प्रदेश) :

क्रिकेटपटू महंमद शमी याच्या पत्नीने मुलीसह स्वत:ला शमीच्या घरात कोंडून घेऊन गोंधळ घातल्याप्रकरणी रविवारी तिला अटक करण्यात आली. त्यानंतर सोमवारी तिची जामिनावर सुटका करण्यात आली.

शमीची पत्नी हसीन जहान रविवारी रात्री शमीच्या साहसपूर अलिनगर येथील घरी पोहोचली. सासू-सासऱ्यांनी तिला अटकाव करून तिथून जाण्यास सांगितले. मात्र, हसीनने मुलीसह स्वत:ला एका खोलीत कोंडून घेत गोंधळ घातला. त्यानंतर पोलिसांना पाचारण करण्यात आले. तिची समजूत घालण्याचा प्रयत्न अयशस्वी ठरल्यानंतर अमरोहा पोलिसांनी तिला ताब्यात घेतले. सोमवारी तिला स्थानिक न्यायालयात हजर करण्यात आले असता, तिची जामिनावर सुटका करण्यात आली. 'मी माझ्या पतीच्या घरी आले होते व इथे राहणे माझा अधिकार आहे. मात्र सासरचे माझ्यासोबत चुकीचे वागत असतानाही पोलिस त्यांनाच पाठिशी घालत आहेत. खरेतर पोलिसांनी त्यांना अटक करायला हवी होती. मात्र, मला पोलिस ठाण्यात आणले', असा आरोप हसीन हिने सुटकेनंतर केला. दरम्यान, महंमद शमी सध्या 'आयपीएल'मध्ये खेळत असून, तो किंग्ज इलेव्हन पंजाबचे प्रतिनिधित्व करीत आहे.