बेंगळुरू : दोन महिन्यांपूर्वी अयशस्वी झालेल्या 'चांद्रयान-२' मोहिमेनंतर भारतीय अंतराळ संशोधन संस्था (इस्रो) पुढील वर्षी नोव्हेंबरमध्ये पुन्हा चंद्रावर स्वारी करण्याची शक्यता असल्याचे समजते.
'इस्रो'ने तिरुवनंथपुरमस्थित विक्रम साराभाई अंतराळ केंद्राचे संचालक एस. सोमनाथ यांच्या अध्यक्षतेखाली एक उच्चस्तरीय समिती नेमली आहे. प्रस्तावित 'चांद्रयान-३'बाबत अहवाल तयार करण्याची जबाबदारी या समितीवर सोपवण्यात आली आहे. समिताचा अहवाल अद्याप प्राप्त झालेला नाही. मात्र या समितीला पुढील वर्षीच्या नोव्हेंबरपर्यंत मोहिमेची तयारी करण्याचे निर्देश देण्यात आले आहेत, असे 'इस्रो'च्या अधिकाऱ्यांनी सांगितले.
नोव्हेंबर ही प्रक्षेपणासाठी चांगली वेळ आहे. यावेळी रोव्हर लँडर व चंद्रावर उतरण्याच्या प्रक्रियेवर अधिक लक्ष केंद्रीत केले जाईल. 'चांद्रयान-२'च्या प्रक्षेपणावेळी ज्या चुका झाल्या, त्यांची पुनरावृत्ती होणार नाही याची पुरेपूर खबरदारी घेतली जाईल, असेही या अधिकाऱ्यांनी नमूद केले.