बिहार, बंगालमध्ये पुराच्या बळींच्या संख्येत वाढ

मटा ऑनलाइन वृत्त। नवी दिल्ली

पूरग्रस्त आसाम, बिहार आणि पश्चिम बंगालमध्ये आणखी काही लोकांना आपले प्राण गमवावे लागले आहेत. या तिन्ही राज्यांमधील सुमारे १ कोटी लोकांना पुराचा तडाखा बसला आहे. या राज्यांमधील रेल्वे वाहतूकही अद्याप पूर्ववत झालेली नाही. आसाममध्ये तर पूरस्तिथी अधिक आक्राळविक्राळ रूप धारण करू पाहत असून या राज्यात ११ लोकांचा मृत्यू झाला आहे. आसाममधील एकूण २४ जिल्ह्यांमधील ३३.४५ लाख लोकांना पुराचा फटका बसला आहे. आसामचे मुख्यमंत्री सर्वानंद सोनोवाल यांनी आज दिल्लीत पंतप्रधान नरेंद्र मोदींची भेट झालेल्या नुकसानीची माहिती दिली.

बिहार राज्यामध्ये पुरामुळे ७२ लोकांनी आपले प्राण गमावले आहेत. राज्यातील १४ जिल्ह्यांमधील ७३.४४ लाख लोकांना पुराचा फटका बसला आहे. नेपाळमध्ये आलेल्या पुराचा परिणाम बिहार राज्यावर झाला आहे. याबाबत हाती आलेल्या वृत्तांनुसार, आसामच्या २९७० गावांमध्ये पुराचे पाणी शिरले आहे. पुरामुळे इथली १.४३ लाख हेक्टरची पिके नष्ट झाली आहेत.

पश्चिम बंगालमध्ये ३२ दगावले

पश्चिम बंगालमध्ये पुराने ३२ लोकांचा बळी घेतला आहे. राज्यातील ६ जिल्ह्यांमधील १४ लाख लोक पुरामुळे हवालदिल झाले आहेत. भूतान, बिहार आणि झारखंडच्या नद्यांना पूर आल्याने पश्चिम बंगालमध्ये पूर आला आहे. पुरामुळे राज्यात १०४ पाळीव जनावरे देखील मृत्युमुखी पडल्याची माहिती बंगालच्या आपत्ती व्यवस्थापन विभागाच्या एका वरिष्ठ अधिकाऱ्याने दिली.