सुनेचा खून; आईनं मुलाला पोलिसांच्या ताब्यात दिलं!

मटा ऑनलाइन वृत्त । नवी दिल्ली

आई आपल्या मुलाचं वाईट कसं करू शकते, या विश्वासानं बायकोच्या खुनाची कबुली आईकडं देणं एका तरुणाला महागात पडलं आहे. आरोपी मुलानं गुन्ह्याची कबुली देताच आईनं त्याला थेट पोलिसांच्या ताब्यात दिल्याची घटना दिल्लीत घडली आहे. या न्यायप्रिय आईचं सगळीकडं कौतुक होत आहे.

दिल्लीतील कंझावाला परिसरातील हे प्रकरण आहे. जे जे कॉलनीत दुकान असलेल्या मनोजचा कोमलशी प्रेमविवाह झाला होता. मात्र, त्याला कोमलच्या चारित्र्यावर संशय होता. त्यामुळं त्यांच्यात वाद होत. या वादाला कंटाळून कोमल माहेरी निघून गेली होती. मनोजनं तिच्याकडं पुन्हा सासरी येण्याचा तगादा लावला होता. मनोजच्या सततच्या विनंतीमुळं गेल्या शुक्रवारी ती परतली. मात्र, परत आल्यानंतर घरी घेऊन जाण्याऐवजी तो तिला जंगलात घेऊन गेला आणि तिथं गळा दाबून तिचा खून केला. खुनानंतर मनोजनं तिचा मृतदेह झुडपांमध्ये लपवून ठेवला.

आईनं पोलिसांना बोलावलं!

बायकोला मारल्यानंतर मनोजनं मोठ्या विश्वासानं आपल्या आईला ही गोष्ट सांगितली. आई याविषयी कोणालाही सांगणार नाही, असं त्याला वाटत होतं. मात्र, त्याच्या आईनं भावनेच्या आहारी न जाता जे योग्य होतं तेच केलं. तिनं स्वत: पोलिसांना बोलावून मनोजला त्यांच्या ताब्यात दिलं.