नशीब पालटले; मजुराला सापडला १० लाखांचा हिरा

भोपाळ:
मध्य प्रदेशच्या पन्ना जिल्ह्यात खोदकामादरम्यान एका मजुराला ४.३३ कॅरेटचा हिरा सापडला! या मजुराने दोन दिवसांपूर्वीच ही खाण २०० रुपये पट्ट्यावर भाड्याने घेतली होती. अधिकाऱ्यांनी सांगितलं की मजुराला मिळालेल्या हिऱ्याची किंमत १० लाख रुपये आहे. हिऱ्याचा लिलाव झाल्यानंतर मजुराला हे पैसे मिळणार आहेत.

मिळालेल्या माहितीनुसार, पन्ना जिल्ह्यातील शाहनगरमध्ये राहणारे वसंत सिंह मजुरीचं काम करतात. २५ सप्टेंबरला कल्याणपूर भागात त्यांना २०० रुपये भाड्यावर ६ मी. x ४ मी. पट्टा देण्यात आला. त्यावर त्यांना पुढील तीन महिन्यांसाठी खोदकामाची परवानगी दिली होती, पण खोदकामाच्या दुसऱ्याच दिवशी त्यांच्या नशिबाचे दरवाजे उघडले. शनिवारी खोदकामात मिळालेले दगड धुताना त्यांना हा हिरा सापडला.

लिलाव होणार

सिंह यांना हा हिरा सापडताच ते आनंदात पोहोचले. कुटुंबीयांना त्यांनी हा हिरा दाखवला. नंतर पन्ना डायमंड ऑफिसर एस.एन. पांडे यांच्याकडे त्यांनी तो तपासणीसाठी नेला. तेव्हा कळलं की ४.३३ कॅरेटचा हिरा आहे. तो हिरा सिंह यांनी त्यांच्या कार्यालयात जमा केला. येत्या काही दिवसांत या हिऱ्याचा लिलाव होणार आहे. यातून मिळणाऱ्या पैशांतून ११.५ टक्केट सरकारी रॉयल्टी आणि २ टक्के अन्य करांची रक्कम वगळता उर्वरित सर्व रक्कम वसंत सिंह यांना मिळणार आहे.