सपा-काँग्रेस आघाडीचा प्रचार करणार नाही: मुलायम

मटा ऑनलाइन वृत्त । लखनऊ/दिल्ली

समाजवादी पार्टीचे मार्गदर्शक मुलायम सिंह यांनी मुख्यमंत्री अखिलेश यादव यांना पुन्हा एकदा जोरदार झटका दिला आहे. काँग्रेस-समाजवादी पार्टीची आघाडीच फेटाळून लावत आघाडीच्या समर्थनार्थ प्रचार करणार नसल्याचे मुलायम यांनी स्पष्ट केले आहे.

मुलायम म्हणाले की, 'समाजवादी पार्टी एकट्याने निवडणूक लढण्यास समर्थ आहे. पक्षाला कोणाशीही युती करण्याची गरज नाही. या युतीच्या समर्थनार्थ मी कधीच प्रचार करणार नाही.'

अखिलेश यादव पक्षाचे अध्यक्ष बनल्यानंतर पार्टीच्या मार्गदर्शकाची भूमिका निभावणारे मुलायम सिंह यादव म्हणाले की या युतीमुळे आमच्या पक्षाच्या नेत्यांचे नुकसान होईल. आमच्या काम करणाऱ्या नेत्यांचे तिकिट कापले गेले आहे. ते आता काय करणार? त्यांना आता ५ वर्षांपर्यंत संधी मिळणार नाही. त्यामुळे मी या युतीला विरोध करत आहे.

रविवारी अखिलेश आणि राहुल गांधी यांची संयुक्त पत्रकार परिषद घेण्यात आली. रोड शोचेही आयोजन करण्यात आले होते. पत्रकार परिषदेत व्यासपाठीवर लावलेल्या पोस्टरमध्ये मुलायम यांचे छायाचित्र होते, पण मुलायम यांना सपाची ही काँग्रेससोबत होणारी मैत्री मुलायम यांना खटकत आहे.

बालियान यांचे वादग्रस्त वक्तव्य

'मुलायम यांच्या जगण्याची वेळ संपली आहे, त्यांच्या मरणाची वेळ आली आहे,' असे अपशब्द भाजपचे केंद्रातले कृषीमंत्री संजीव बालियान यांनी काढले. मथुरा येथील छाता येथे एका रॅलीदरम्यान ते पत्रकारांशी बोलत होते.

'मुलायम सिंह यादव यांनी नेहमी धर्माचे राजकारण केले. पण आता या निवडणुकीत समाजवादी पार्टी गाडली जाणार आहे. त्यामुळे आता मुलायम यांच्या मरणाची वेळ आली आहे,' असे बालियान म्हणाले.