मुंबई हल्ल्याचा सूत्रधार लखवीचा पुतण्या ठार

मटा ऑनलाइन वृत्त । नवी दिल्ली

काश्मीरच्या उत्तर भागात गुरुवारी झालेल्या चकमकीत सुरक्षा दलांनी मुंबई हल्ल्याचा सूत्रधार झकी उर रहमान लखवी याच्या पुतण्याचा खात्मा केला. गेल्या वर्षी १५ ऑगस्टला नौहट्टा चौक येथे सीआरपीएफच्या चौकीवर दहशतवादी हल्ला झाला होता. या हल्ल्याचा कट लखवीचा हा पुतण्या अबु मुसाइब उर्फ ताहिरने रचला होता. हल्ल्यात कमांडंट प्रमोदकुमार शहीद झाले होते. लष्कर ए तोयबाचा कमांडार असलेला लखवी २६ नोव्हेंबर २००८ ला झालेल्या मुंबई दहशतवादी हल्ल्याचा सूत्रधार आहे.

काश्मीर खोऱ्यात गेल्या काही वर्षात लष्कर ए तोयबाच्या हलचाली वाढल्या आहेत. या मध्ये मुसाइबची मोठी भूमिका होती. लखवी त्याचा त्याच्याशी थेट संपर्क होता. याशिवाय पाकिस्तानमधील दहशतवादी संघटनांच्या प्रमुखांशी त्याचा संपर्क होता. 'दहशतवाद्यांसाठी पैसा, शस्त्रास्त्र आणि दारुगोळ्याची व्यवस्था करणं. तसंच काश्मीरमधील हिंसक आंदोलनं चिघळवण्याचं काम मुसाइब करत होता. सुरक्षा दलाच्या जवानांची शस्त्र हिसकावण्याच्या योजनेतही त्याचा हात होता. यामुळे सुरक्षा दल त्याच्या मागावर होते', अशी माहिती एका अधिकाऱ्याने दिली.



'सर्व दलांच्या संयुक्त मोहिमेतून कारवाई करत आम्ही या दहशतवाद्याला टिपण्यात यशस्वी झालो. गुरुवारी सकाळी सुरक्षा दलांनी केलेल्या कारवाईत त्याचा खात्मा केला. १५ ऑगस्ट २०१६ ला सुरक्षा दलांवर झालेल्या आत्मघाती हल्ल्याचा मुसाइब सूत्रधार होता', असं सीआरपीएफचे महानिरीक्षक जुल्फिकार हसन यांनी सांगितलं.

ऑक्टोबर २०१५ मध्ये १४ राष्ट्रीय रायफल्सच्या एका जवानाची रायफल हिसकावण्याच्या घटनेत मुसाइब सामील होता. पाकिस्तानात राहणारा मुसाइब ऑगस्ट २०१५ पर्यंत बांदीपोरा आणि गांदरबल क्षेत्राचा लष्कर ए तोयबाचा विभागिय कमांडर म्हणून सक्रिय होता.