पायलट किंवा ज्योतिरादित्यना काँग्रेसचे अध्यक्ष करा : देवरा

नवी दिल्ली : काँग्रेस नेता राहुल गांधी यांनी काँग्रेसच्या अध्यक्षपदाचा राजीनामा दिल्यानंतर पक्षाच्या महासचिव प्रियांका गांधी यांना अध्यक्ष करण्याच्या मागणीने जोर धरलेला असतानाच काँग्रेसचे नेते, माजी मंत्री मिलिंद देवरा यांनी मात्र काँग्रेसच्या अध्यक्षपदासाठी ज्योतिरादित्य शिंदे आणि सचिन पायलट यांची नाव सूचवली आहेत. या दोन तरूण नेत्यांपैकी एकाला अध्यक्ष करण्याची मागणीही त्यांनी केली आहे. त्यामुळे काँग्रेसच्या अध्यक्षपदी कोण विराजमान होणार याची पुन्हा एकदा उत्सुकता वाढली आहे.

सचिन पायलट आणि ज्योतिरादित्य शिंदे यांची नावं सूचवतानाच मिलिंद देवरा यांनी पक्षाचा भावी अध्यक्ष तरूण असावा, अनुभवी असावा, प्रशासकीय अनुभव असावा या पंजाबचे मुख्यमंत्री कॕप्टन अमरिंदर सिंग यांच्या मताशी सहमतीही दर्शवली आहे. मला वाटत पायलट आणि ज्योतिरादित्य या दोघांमध्ये या साऱ्या गुणवत्ता आहेत. संघटनेत ते त्यांची गुणवत्ता सिद्ध करू शकतील, तसेच हे दोघे विरोधी पक्षाची निर्माण झालेली पोकळीही भरून काढतील, असं देवरा यांनी एका वृत्त संस्थेशी बोलताना सांगितलं.

पायलट किंवा ज्योतिरादित्यना अध्यक्ष करता येत नसेल तर या दोघांपैकी एकाला तरी किमान हंगामी अध्यक्ष तरी करण्यात यावे. हे दोघेही गांधी घराण्याच्या मागे उभे राहतील, असे सांगतानाच गांधी कुटुंबीय माझ्या या मताशी कदाचित सहमत होणार नाही, अशी पुस्तीही त्यांनी जोडली.

या दोघांपैकी अन्य कुणाला पक्षाने अध्यक्ष केले तर चालेल काय? असा प्रश्न केला असता पक्षाने सामूहिकरित्या घेतलेल्या कोणत्याही निर्णयाचं मी स्वागतच करेन. परंतु, पक्ष किंवा जनतेने मी दिलेल्या प्रस्तावावर असहमती दर्शवली तर मला त्याचे निश्चितच आश्चर्य वाटेल, असंही त्यांनी स्पष्ट केलं.

अध्यक्ष पदाच्या व्यक्तीची निवड करण्यात उशीर होत असून त्यामुळे पक्षाचेच नुकसान होत असल्याचंही त्यांनी मान्य केलं. राहुल गांधी यांनी पक्षाध्यक्षपद सोडणं हा दुर्देवी निर्णय होता असं सांगतानाच प्रियांका गांधी या अभ्यासू आहेत. मात्र त्यांनी वरिष्ठ पदाची धुरा हाती घेऊ नये हा गांधी कुटुंबाचा निर्णय आहे, त्याचा आदर करूनच पुढे गेले पाहिजे, असंही त्यांनी सांगितलं. यावेळी त्यांनी ते स्वत:ही कुणाही बरोबर आणि कोणत्याही जबाबदारीवर काम करण्यास तयार असल्याचं स्पष्ट केलं. माझी क्षमता आणि योग्यता मला माहीत आहे, असंही ते म्हणाले.