वृत्तसंस्था, नवी दिल्ली
केवळ मराठी पुस्तकेच नव्हे तर मराठी-हिंदी चित्रपटांतून ठाशिवपणे दिसलेली मुंबईच्या 'चाळी'ने आता 'ऑक्सफर्ड'च्या शब्दकोषातही स्थान मिळवले आहे. 'चाळ'बरोबरच 'आधार', 'डिब्बा', 'हडताल', 'शादी' यांच्यासह २६ भारतीय-इंग्रजी शब्दांचा समावेश शब्दकोषाच्या नव्या आवृत्तीत करण्यात आला आहे.
ऑक्सफर्ड शब्दकोषाची दहावी आवृत्ती शुक्रवारी प्रसिद्ध करण्यात आली. यादीत एकूण ३८४ भारतीय-इंग्रजी शब्द आहेत. त्याशिवाय 'चॅटबॉट', 'फेक न्यूज' आणि 'मायक्रोप्लास्टिक' यांच्यासह एक हजार नव्या शब्दांचा समावेश आहे. हा शब्दकोष वेळोवेळी सुधारण्यात येतो आणि भाषाबदलावर मुख्यत: लक्ष केंद्रीत केले जाते, असे 'ऑक्सफर्ड युनिव्हर्सिटी प्रेस'कडून (ओयुटी) सांगण्यात आले.
'ऑक्सफर्ड'च्या दहाव्या आवृत्तीत समाविष्ट करण्यात आलेल्या २६ नव्या भारतीय-इंग्रजी शब्दांपैकी २२ शब्द या कोषाच्या छापील आवृत्तीत आणि चार शब्द डिजिटल आवृत्तीत समाविष्ट करण्यात आले आहेत, असे 'ओयुटी'च्या व्यवस्थापकीय संचालक फातिमा दाडा यांनी सांगितले.
अन्य नवे शब्द...
ऑन्टी (मूळ इंग्रजी शब्दही इंग्रजी कोषात आहे. पण स्पेलिंगमध्ये फरक आहे. auntie आणि aunty) बस स्टॅण्ड, डीम्ड युनिव्हर्सिटी, एफआयआर, नॉनवेज, रिड्रेसल, टम्पो, ट्यूबलाइट, वेज आणि व्हिडीओग्राफ
ऑनलाइन आवृत्तीतील चार नवे शब्द...
करंट (इलेक्ट्रिसिटीला समानअर्थी), लूटर, लूटिंग, उपझिला (उपजिल्हा)