पंतप्रधानांना पत्र लिहून तिने मांडली व्यथा

मटा ऑनलाइन वृत्त । बेंगळुरू

पंतप्रधान नरेंद्र मोदी यांच्या त्वरित प्रतिसादामुळे एका मुस्लीम मुलीला तिचे शिक्षणाचे स्वप्न पूर्ण करता येणार आहे. बी.बी. सारा असे या मुलीचे नाव आहे. एमबीएची विद्यार्थिनी असणाऱ्या साराला बँकेने शैक्षणिक कर्ज नाकारले तेव्हा तिने थेट पंतप्रधानाना पत्र लिहीले आणि मोदींनीही या पत्राची दखल घेतली.

कर्नाटकातल्या मंड्या येथील साराने सेंट्रल बँक ऑफ इंडियात शैक्षणिक कर्जासाठी अर्ज केला होता. पण तिने आधी घेतलेले कर्ज फेडले नसल्याचे कारण पुढे करत बँकेने तिला कर्ज नाकारले. त्यानंतर तिने पंतप्रधानांना पत्र लिहून मदत मागायचे ठरवले. पत्र मिळाल्यानंतर दहाच दिवसांत तिच्या पत्राला उत्तर आले. पंतप्रधान कार्यालयाने तातडीने पावले उचलत साराला विजया बँकेचे कर्ज मिळवून दिले. साराला मोदींना प्रत्यक्ष भेटून त्यांचे आभार मानायचे आहेत.

'माझे वडील एका साखर कारखान्यात काम करतात, त्यामुळे मी कर्ज फेडणार नाही अशी शक्यता गृहित धरून बँकेने कर्ज नाकारले,' असे साराने 'एएनआय' ला सांगितले. 'पंतप्रधान माझ्या पत्राची दखल घेतील, अशी मला अपेक्षा होती, पण इतक्या लवकर घेतील असे वाटले नव्हते,' अशा शब्दात साराने आपल्या भावना व्यक्त केल्या.