मुस्लिमांनी केले हिंदू तरुणावर अंत्यसंस्कार

मटा ऑनलाइन वृत्त । कोलकाता

धर्म, रुढी, प्रथा-परंपरा या विषयांवरून सोशल मीडियात बराच खल सुरू आहे. त्यात जो-तो आपल्या धर्माची श्रेष्ठता पटवून देतोय. अशावेळी, कोलकात्याच्या मालदा जिल्ह्यातील एका छोट्या गावातील काही मुस्लिम तरुणांनी माणुसकीच्या धर्माचं दर्शन घडवलंय. आपला धर्म बाजूला ठेवत या तरुणांनी एका गरीब हिंदू तरुणावर अंत्यसंस्कार केले.

विश्वजीत रजक याचा यकृताच्या कर्करोगाने सोमवारी मृत्यू झाला. घरची परिस्थिती हलाखीची असल्याने त्याच्या कुटुंबाला त्याच्यावर अंत्यसंस्कार करणे शक्य नव्हते. हे गावातील मुस्लिम तरुणांना समजताच ते रजक कुटुंबीयांच्या मदतीला धावून आले. विश्वजीतच्या वडिलांची परवानगी घेऊन त्यांनी त्याच्यावर अंत्यसंस्कार केले.

विश्वजीतवर अंत्यविधी करण्यासाठी गावकऱ्यांनी पैसे गोळा केले. त्यानंतर, 'राम नाम सत्य है' म्हणत या मुस्लिम तरुणांनी विश्वजीतला खांदा दिला. गावातील मशिदीचे मौलवीही यावेळी स्मशानभूमीत उपस्थित होते. सर्व पारंपरिक हिंदू विधी पूर्ण झाल्यानंतर त्याच्या अस्थींचे विर्सजन जवळील नदीत करण्यात आलं.

मुलाच्या मृत्यूमुळे मी दु:खात होतो. माझ्याकडे मुलाच्या अंत्यसंस्कारासाठी पुरेसे पैसे आणि मनुष्यबळही नव्हते. अशा वेळी गावकरी माझ्या मदतीला धावून आले. गावकरी नसते तर माझं काय झालं असतं, याचा विचारही करवत नाही, अशा भावना विश्वजीतच्या वडिलांनी व्यक्त केल्या.